Almaty qalasynyń Taýgúl shaǵyn aýdanyndaǵy kópqabatty turǵyn úıdiń turǵyndary shatyrsyz qalyp, jaýyn-shashynnan zardap shegip jatyr, dep habarlaıdy “Adyrna” ulttyq portaly Habar agenttigine siltep.
Aıtýlarynsha, qatty daýyldan keıin on kún ótse de, jóndeý jumystary aıaqtalmaǵan. Bul týraly Stan.kz aqparat agenttigi «Habar» arnasyna silteme jasap habarlady.
53 úıdiń metall shatyryn daýyl ushyryp áketken. Turǵyndar ýaqytsha polıetılenmen jaýyp qoıǵanymen, ol jańbyrdan qorǵaı almady. Ásirese, joǵarǵy qabatta turatyndar qıyn jaǵdaıda. Shatyrdan aqqan sý qabyrǵalar men tóbege sińip, ishki árleý jumystary buzyla bastaǵan.
«Jańbyrly kún biz úshin tabıǵı apat sekildi. Shatyrdy jóndeımiz dep ýáde berdi, biraq esh nátıje joq. Ákimdikke de, PIK-ke de júgindik. Úsh orama polıetılen berip, shatyrdy ózimiz japtyq», – deıdi turǵyn Lázzat Satylhanova.
Ákimdik ókilderiniń málimetinshe, merdiger kompanııamen birlesip shatyrlardy qalpyna keltirý jumystary josparlanǵan. Alaıda uzaqqa sozylǵan jańbyr aýa raıy jumystyń bastalýyna kedergi keltirip otyr.
«Qazir merdiger uıym áleýmettik jaýapkershilik aıasynda jumys isteýde. Shatyr tolyǵymen myryshtalyp, nyǵaıtylatyn bolady. Jóndeý jumystary baqylaýda», – dedi «Almaty turǵyn úı» JShS dırektory Aıdyn Qalabaev.
Qazirgi tańda turǵyndar tek jóndeý jumystarynyń tezirek bastalýyn kútip otyr. Olar keshigýdiń odan da aýyr zardaptarǵa ákelip soqpaýyn tileıdi.
