وزبەكستان پرەزيدەنتى شاۆكات ميرزياەۆ ءاندىجان وبلىسىنىڭ تۇرعىندارىمەن كەزدەسۋدە بۇل وڭىردە سالىنىپ جاتقان جاڭا قالاعا مەملەكەت جانە قوعام قايراتكەرى، اقىن زاحيريددين مۇحاممەد بابىردىڭ ەسىمىن بەرۋدى ۇسىندى، دەپ حابارلايدى "ادىرنا" ۇلتتىق پورتالى فەرعانا اگەنتتىگىنە سىلتەمە جاساپ.
پرەزيدەنتتىڭ ايتۋىنشا، ءاندىجان – ءدال وسى جەردە بابىر دۇنيەگە كەلگەندىگىمەن ايگىلى، سوندىقتان ۇلى بابانىڭ ارمانىن ورىنداۋ رەتىندە جاڭا قالانىڭ ونىڭ ەسىمىمەن اتالۋى ەرەكشە مانگە يە بولادى.
"بابىر ميرزو – ءامىر تەمىر داۋىرىنەن كەيىنگى رەنەسسانستىڭ لايىقتى جالعاستىرۋشىسى، عىلىم، مادەنيەت، ونەر مەن ادەبيەتتىڭ جاناشىرى، ادامزات دارىنىنىڭ ۇلى وكىلى. ونىڭ بىرەگەي مۇراسى حالقىمىزدى بۇكىل الەمگە تانىتتى", – دەدى شاۆكات ميرزياەۆ.
پرەزيدەنتتىڭ سوزىنشە، جاڭا قالادا اۋقىمدى ءبىلىم بەرۋ كلاستەرى – بالاباقشالار، مەكتەپتەر، ۋنيۆەرسيتەت، مۋزەي، كىتاپحانا مەن IT-پارك سالىنادى. ۋنيۆەرسيتەت اۋماعىندا حالىقارالىق دەڭگەيدەگى سپورت كەشەنى دە بوي كوتەرەدى.
بابىر قالاسى ۇلتتىق قۇندىلىقتاردى بەينەلەيتىن رۋحاني ورتالىق، جاستار ءۇشىن شابىت كوزى، تۋريزم مەن مادەنيەت ورتالىعى، سونداي-اق وزىق تەحنولوگيالارمەن جابدىقتالعان «اقىلدى قالا» بولادى. سونداي-اق، وسى اۋماقتاعى پاركتىڭ ەڭ بيىك جەرىنە بابىرعا ارناپ ەسكەرتكىش ورناتىلماق.
شاۆكات ميرزياۆ بۇل جوبانى جۇزەگە اسىرۋ ءۇشىن 250 ميلليون دوللار بولىنگەنىن اتاپ ءوتتى.
ايتا كەتەيىك، ءاندىجان – وزبەكستانداعى ەڭ تىعىز قونىستانعان قالا. ەل حالقىنىڭ 10%-ى ونىڭ 1% اۋماعىندا تۇرادى. وسىعان بايلانىستى 2021 جىلى پرەزيدەنت ميرزياەۆ جاڭا قالا سالۋ باستاماسىن كوتەرگەن بولاتىن. قازىرگى ساپارى بارىسىندا ول جوبا اياسىندا ىسكە اسىرىلعان العاشقى جۇمىستارمەن تانىستى.
بابىر ەسىمى بەرىلگەن جاڭا قالا ءاندىجان اۋدانىنداعى 4 مىڭ گەكتار اۋماقتا سالىنىپ جاتىر. قالا قۇرىلىسى سەگىز كەزەڭمەن جۇزەگە اسادى.
قالا قۇرىلىسى اياقتالعان سوڭ بابىر قالاسىندا 410 مىڭنان استام ادام تۇرادى دەپ جوسپارلانۋدا.
