Telegram جانە WhatsApp مەسسەندجەرلەرىندە سەمەي قالاسىنداعى مەكتەپتەردە "تەراكت جاسالادى" دەگەن جالعان حابارلامالار تارادى، دەپ حابارلايدى "ادىرنا" ۇلتتىق پورتالى.
بۇل اقپاراتتى اباي وبلىسىنىڭ پوليتسيا دەپارتامەنتى رەسمي تۇردە جوققا شىعاردى.
قاۋىپ توندىرەتىن حابارلامالار «كونەتس سەمەي» اتاۋىمەن اشىلعان تەلەگرام-ارنادا جاريالانعان. انونيم اۆتورلار قالا مەكتەپتەرىندە تەراكت ۇيىمداستىرۋعا نيەتتى ەكەنىن جازعان. كەيىن بۇل ارنا جويىلدى.
اباي وبلىسى پوليتسيا دەپارتامەنتى بۇل اقپاراتتىڭ شىندىققا جاناسپايتىنىن حابارلادى:
«اتالعان مالىمەتتەر شىندىققا سايكەس كەلمەيدى جانە حالىق اراسىندا ۇرەي تۋدىرۋ ماقساتىندا تاراتىلعان. پوليتسيا دەپارتامەنتى ازاماتتاردى سابىر ساقتاۋعا، ارانداتۋشىلىققا ەرمەۋگە جانە تەك رەسمي اقپارات كوزدەرىنە سەنۋگە شاقىرادى»، – دەلىنگەن حابارلامادا.
دەگەنمەن، سەمەي قالاسىنداعى بارلىق مەكتەپتەردە قاۋىپسىزدىك شارالارى كۇشەيتىلدى. ءتارتىپ پەن تىنىشتىقتى قامتاماسىز ەتۋ ماقساتىندا مەكتەپتەردە پوليتسيا قىزمەتكەرلەرى كەزەكشىلىك ەتۋدە.
سونىمەن قاتار، پوليتسيا دەپارتامەنتى جالعان اقپارات تاراتۋ زاڭ بويىنشا قاتاڭ جاۋاپكەرشىلىككە اكەلەتىنىن ەسكە سالدى.
