اقش-تىڭ بۇرىنعى پرەزيدەنتى دجو بايدەن اق ۇيدەن كەتكەننەن كەيىن العاش رەت ءسوز سويلەدى، دەپ حابارلايدى "ادىرنا" ۇلتتىق پورتالى.
دجو بايدەن كەشە چيكاگودا وتكەن كونفەرەنتسيادا ءسوز سويلەپ، سول جەردە وعان «ءۇمىت شامشىراعى» سىيلىعى تابىستالدى. بۇل شارانى امەريكالىق تەلەارنالار تىكەلەي ەفيردە كورسەتتى.
بايدەن پرەزيدەنت دونالد ترامپتىڭ ەكىنشى مەرزىمىن اشىق سىنعا الىپ، ونىڭ الەۋمەتتىك قامسىزداندىرۋ اگەنتتىگىنە قاتىستى ارەكەتتەرىن «بۇزۋشى» دەپ اتادى.
«نە بولعانىنا قاراڭىزدار. جاڭا اكىمشىلىك نەبارى 100 كۇن ىشىندە قانشاما زيان كەلتىرىپ، قانشاما نارسەنى ءبۇلدىرىپ ۇلگەردى. بۇل وسىنشا قىسقا ۋاقىت ىشىندە وسىنداي وقيعالاردىڭ ورىن الۋى – شىن مانىندە ەسىڭدى شىعارادى»، – دەدى دجو بايدەن.
ول ترامپتىڭ اتىن تىكەلەي اتاماي، «اناۋ جىگىت» دەگەن تىركەستى قولداندى.
ەكس-پرەزيدەنت مەملەكەتتىك قىزمەتكەرلەردىڭ جاپپاي قىسقارتىلۋىن جانە ەلدەگى ناسىلدىك ادىلەتسىزدىكتى دە سىنعا الدى.
«بۇل ۋاقىت ارالىعىندا 7 مىڭ قىزمەتكەر جۇمىستان كەتتى، ولاردىڭ اراسىندا ەڭ تاجىريبەلى كادرلىق شەنەۋنىكتەر دە بار. ەندى ولار تاعى مىڭداعان ادامدى شىعارىپ تاستاۋعا دايىندالىپ جاتىر»، – دەدى بايدەن.
سونداي-اق، ول فەدەرالدى قىزمەتكەرلەر مەن مەملەكەتتىك شىعىنداردى قىسقارتۋدى جاقتايتىن يلون ماسكتى تىكەلەي اتاماي، جاڭا اكىمشىلىكتەگى مادەنيەتتى «تەحنوستارتاپتارعا» تەڭەپ، سىن ايتتى.
«ولار تەحنوستارتاپتارعا ءتان ەسكى ۇراندى ۇستانۋدا –“تەز قوزعال، ءبارىن بۇز”. ولار راسىمەن ءبارىن بۇزىپ جاتىر. الدىمەن اتادى، كەيىن كوزدەيدى. سونىڭ سالدارىنان قاجەتسىز اۋىرتپالىقتار مەن ۇيقىسىز تۇندەر تۋىندايدى»، – دەدى بايدەن.
ساياساتكەر قازىرگى امەريكا تاريحىندا ەل ەشقاشان ءدال وسىلاي بولىنبەگەنىن ايتىپ، حالىقتىڭ 30 پايىزىنىڭ «جۇرەگى جوق» دەپ باعالادى.
بايدەن رەسپۋبليكالىق پارتيانى الەۋمەتتىك قامسىزداندىرۋ اگەنتتىگىن قاساقانا كۇيرەتۋگە ۇمتىلىپ وتىر دەپ ايىپتادى. ونىڭ ايتۋىنشا، ولار وسى ارقىلى الەۋمەتتىك قامسىزداندىرۋ قورىنىڭ قاراجاتىن پايدالانىپ، ترامپتىڭ ءبىرىنشى مەرزىمىندە قابىلدانعان سالىقتىق جەڭىلدىكتەردى ۇزارتقىسى كەلەدى.
«بۇل نە ءۇشىن بولىپ جاتىر؟ نەگە ولار الەۋمەتتىك قامسىزداندىرۋدى كوزدەپ وتىر؟ ولار ونى قيراتقىسى كەلەدى. نەگە؟ سەبەبى توناۋ ءۇشىن. ال نە ءۇشىن توناعىسى كەلەدى؟ ميللياردەرلەر مەن ءىرى كورپوراتسيالارعا سالىقتىق جەڭىلدىكتەر بەرۋ ءۇشىن. ولار 2017 جىلعى جەڭىلدىكتەردى تۇراقتى ەتكىسى كەلەدى، ال بۇل جەڭىلدىكتەر نەگىزىنەن ەڭ باي امەريكالىقتارعا جانە الپاۋىت كومپانيالارعا پايدا اكەلدى. بۇل 5 تريلليون دوللارعا تۇسەدى. ولار بۇل اقشانى قايدان الادى؟ ولار بيۋدجەت تاپشىلىعىن ۇلعايتا بەرەدى. بۇل – ولاردىڭ ءاردايىم جاسايتىنى. ال سوسىن اقشانى باسقا جاقتان الادى»، – دەدى دجو بايدەن.
