- ەرمەك اعا، ءبىلىم سالاسىندا بىلەك سىبانىپ تۇرىپ، قىزمەت ىستەپ جۇرگەن بەلسەندى ازاماتتىڭ ءبىرىسىز. قازىر ەل ءىشى جاپپاي جاساندى اقىل وي تۋرالى كوپ ايتىپ ءجۇر عوي. وسى رەتتە قازاقستانداعى ايتي الەمدىك ستاندارتتارمەن سالىستىرعاندا قاي دەڭگەيدە؟
- ارتىق ايتتى دەپ سوكپەڭىز، ءبىزدىڭ ايتي كادرلەر الەمدىك نارىقتا مىقتاپ ءوز ورنىن الماققا ىنتا-شىنتاسىمەن تىرىسىپ ءجۇر. وعان 2019 جىلى قۇرىلعان «Alem School» مەكتەبى دە ءوز ۇلەسىن قوستى دەپ باتىل ايتا الامىن. ەڭ قىزىعى بۇل زاماناۋي مەكتەپتىڭ مۇعالىمى مەن دەكانى، ءتىپتى ساباق كەستەسى دە جوق. ءبىلىم قۋعان بالالارعا ارنايى تاپسىرمانى 24 ساعات جۇمىس جاساپ تۇراتىن كومپيۋتەردەگى باعدارلاما بەرىپ وتىرادى. ايتي فابريكا دەپ باعالانعان مەكتەپ – وقۋشىسىنا ءبىلىم عانا ەمەس، يننوۆاتسيالىق شەشىم قابىلداۋ، ساندىق جۇيەنى شەبەر مەڭگەرۋ، ەڭ باستىسى بىرىگىپ، كوماندامەن جۇمىس جاساۋدى ۇيرەتەدى. جانە ءبىلىمدى مۇعالىم ەمەس، بالالار جانە كومپيۋتەرلىك باعدارلاما باعالاپ وتىرادى.
- قىزىق ەكەن، ايتي سالاسى ءۇشىن ءداستۇرلى ءبىلىم بەرۋ جاراماي قالدى دەيسىز عوي؟ بۇل مەكتەپكە ءتۇسۋ ءۇشىن قانداي بازالىق ءبىلىمىڭ بولۋى شارت؟
- قاتىپ قالعان شەكتەۋ جوق. مىسالى بىزدە شاحتەر بولىپ جۇمىس ىستەگەن ادام كەلىپ، پروگرامميست بولىپ شىقتى. بۇرىن تەلەفون ساتۋشى بولعاندارى دا بار. ايتپاعىم — بىزدەگى وقۋدىڭ ءبىر ەرەكشەلىگى: ول — گەيميفيكاتسيا، ياعني، ويىن نەگىزىندە قۇرىلعان، ال ستۋدەنت وقۋ باسىنان ءوزىن سول ويىننىڭ كەيىپكەرى رەتىندە سەزىنەدى. ءارى ءار سىناقتان وتكەن سايىن سول ويىننىڭ كەيىپكەرى رەتىندە ناتيجە كورسەتىپ، سول ويىننىڭ كەيىپكەرى رەتىندە ۇپاي جينايى جانە باسقا ستۋدەنتتەرمەن باسەكەلەسەدى جانە ءوزارا كوماندا قۇرىپ، بىرگە جۇمىس جاسايدى. وسىنىڭ ناتيجەسىندە ستۋدەنتتەردىڭ قىزىعۋشىلىعى وتە جوعارى. ويىن نەگىزىندە وسى وقۋدى ءبىتىرىپ شىعادى.
- بىلۋىمشە، فرانتسۋز كاسىپكەرى حاۆەر ءنيلدىڭ ادىسىمەن سالىنعان مۇنداي مەكتەپتەگى ءبىلىم الۋ ۇزاقتىعى ءۇش جىل. بىزدە قالاي؟
- ءيا، دۇرىس ايتاسىز. باستاپقىدا ءبىز وسى ادىسپەن ءبىلىم الدىق، ۋاقىت وتە كەلە ءوز پلاتفورمامىزدى ازىرلەپ الدىق. سوندىقتان بىزدەگى ءبىلىم بەرۋ ءبىر جىل. باسى ارتىق ديپلوم، سەرتيفيكات سۇرامايمىز. بازالىق اعىلشىن ءتىلىڭ بولسا، ىنتاڭ بولسا — مارحابات!
- بەس جىلدا قانشا ستۋدەنتتى دايارلاپ شىقتىڭىزدار؟
- بەس جىلدا ون توعىز مىڭنان اسا ازاماتتان وقۋعا ءوتىنىش ءتۇستى. 900 دەن استام ستۋدەنت قابىلداندى. ونىڭ التى ءجۇزىن ەڭبەك نارىعىنا ساقاداي ساي ەتىپ، دايىنداپ شىعاردىق. جۇمىسقا ورنالاسۋ كورسەتكىشى وتە جوعارى. بىتىرە ساپ، باسقا باعىتقا كەتىپ قالاتىن شاكىرت از. بىلاي ايتايىنشى، وقۋعا تۇسكەننەن كەيىنگى جارتى جىلدا-اق شاكىرتتەردىڭ الپىس پايىزى جۇمىسقا تۇرادى. ال وقۋدى بىتىرگەننەن كەيىن جۇمىسقا ورنالاسقاندار توقسان پايىزدى قۇراپ وتىر. «Alem School» ەندى اشىلعاندا ورتالىق ازيا مەملەكەتتەرىنىڭ ىشىندە ر2ر پرينتسيپىمەن وقىتاتىن بىرەگەي ءبىلىم بەرۋ ورداسى بولعان، قازىر باسەكەلەستەرىمىز كوپ.
- ەرمەك اعا، سۇحباتتىڭ باسىندا جاساندى اقىل ويدىڭ دەندەپ ەنىپ جاتقانىن ايتىپ وتتىك قوي. وسى تۋرالى دا پىكىرىڭىزدى بىلگىمىز كەلەدى.
- بۇل سالا ءبىزدىڭ ستۋدەنتتەرگە عانا قاتىستى ەمەس، ءبارىمىزدى ومىردە دە، تۇرمىستا دا، جۇمىستا دا مىقتاپ قامتىپ الدى عوي. دەسە دە اسىرەسە، ءبىزدىڭ شاكىرتتەر وقۋ بارىسىندا جاساندى اقىل ويدىڭ كومەگىن ءتيىمدى قولدانۋ ءۇشىن كاسىبي مۇمكىندىكتەرىن تەرەڭ پايدالانىپ ءجۇر. بولاشاقتا وڭ جەمىسىن كورەمىز دەپ سەنەم.
- ەرمەك اعا، ءسىزدىڭ ايتي مەكتەپتە جۋرناليستەردى دايىنداۋ جوسپاردا بار ما؟ اقپاراتتى بارىنشا ءتيىمدى جەتكىزۋ جولىندا جاساندى اقىل ويدىڭ مۇمكىندىگى مول عوي؟
- ناقتى ايتي سالاسىنداعى جۋرناليستەردى دايارلاپ شىعۋ جوسپاردا جوق. بىراق ويلانىپ كورۋگە بولاتىن قىزىق ساۋال ەكەن. داتا اناليتيكا، كيبەرقاۋىپسىز سالاسىن دامىتۋ سالاسىن قولعا الدىق قوي، ال ءسىز ايتىپ وتىرعان اقپاراتتىق قاۋىپسىزدىك ايتيمەن تىعىز بايلانىستى.
- ءمان-ماعىنالى سۇحباتىڭىز ءۇشىن كوپ راقمەت، سىزگە جانە ءسىزدىڭ شاكىرتتەرىڭىزگە تولاعاي تابىس تىلەيمىز!
