بۇگىن وبلىس اكىمى، وبلىستىق قازاقستان حالقى اسسامبلەياسىنىڭ توراعاسى نۇرلىبەك نالىباەۆتىڭ توراعالىعىمەن قازاقستان حالقى اسسامبلەياسىنىڭ 30 جىلدىعىنا وراي كەڭەيتىلگەن كەڭەس ءوتتى. باسقوسۋعا جاۋاپتى سالا باسشىلارى، قالا، اۋدان اكىمدەرى مەن زيالى قاۋىم وكىلدەرى، قحا مۇشەلەرى قاتىستى.
ايماق باسشىسى اسسامبلەيا قىزمەتىنىڭ ماڭىزدىلىعىن ايتىپ، وڭىردەگى اۋقىمدى ءىس-شارالارعا توقتالدى.
«بارشاڭىزدى بەرەكە-بىرلىگىمىزدىڭ ۇيىتقىسىنا اينالىپ، ەلىمىزدەگى ەتنوسارالىق دوستىق پەن بىرلىكتىڭ ۇلگىسىن الەمگە تانىتقان قازاقستان حالقى اسسامبلەياسىنىڭ 30 جىلدىق مەرەكەسىمەن قۇتتىقتايمىن. وسى جىلدار ىشىندە اسسامبلەيا حالقىمىزدى بىرلىككە، دوستىققا ۇندەيتىن جالپىۇلتتىق كەلىسىمنىڭ نەگىزىنە اينالدى.
وڭىرىمىزدە سوڭعى جىلدارى ماڭىزدى جوبالار جۇزەگە اسىرىلۋدا. قۇرىلىس قارقىن الىپ، ەل يگىلىگى ءۇشىن الەۋمەتتىك نىساندار بوي كوتەرۋدە. الەۋمەتتىك-ەكونوميكالىق كورسەتكىشتەرىمىز كۇن ساناپ ءوسىپ كەلەدى.
بۇگىندە بارلىق اۋدانداعى «رۋحانيات ورتالىقتارىندا» ەلدىڭ ىنتىماعىن نىعايتۋعا باعىتتالعان ماڭىزدى جوبالار ىسكە اسىرىلۋدا. ورتالىقتارداعى «قوعامدىق كەلىسىم» كابينەتتەرى ەتنوس وكىلدەرىنىڭ مادەني-رۋحاني بىرەگەيلىگىن دامىتۋعا مۇمكىندىك بەرەدى.
اسسامبلەيانىڭ مەرەيلى جىلىندا بارشامىز ءۇشىن قۋانىشتى جاڭالىق – قىزىلوردا قالاسىندا جاڭا «دوستىق ءۇيى» سالىنادى. عيمارات جىل سوڭىندا ەل يگىلىگىنە تابىستالادى. بۇل ايماق جۇرتشىلىعىنىڭ بىرلىگى مەن ىنتىماعىن نىعايتۋعا اتسالىسقان ەتنومادەني بىرلەستىكتەرگە ارنالعان، بارلىق قاجەتتىلىكتەرمەن قامتاماسىز ەتىلگەن زاماناۋي عيمارات بولادى»، – دەدى ن. نالىباەۆ.
وتىرىستا وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ، وبلىستىق قازاقستان حالقى اسسامبلەياسى توراعاسىنىڭ قوعامدىق نەگىزدەگى ورىنباسارى ديلفۋرا بايراقتاروۆا، اسسامبلەيا جانىنداعى عىلىمي-ساراپشىلىق توپتىڭ جەتەكشىسى ايتجان ورازباقوۆ، ارداگەر اسىلبەك جۇماباەۆ ءسوز سويلەپ، ايماقتاعى جەتىستىكتەردى اتاپ ءوتتى.
باسقوسۋدا مەملەكەت باسشىسىنىڭ 2025 جىلعى 8 ساۋىردەگى جارلىعىنا سايكەس قازاقستان حالقى اسسامبلەياسىنىڭ 30 جىلدىعىنا ارنالعان مەرەكەلىك مەدال تابىستالدى. ءوڭىردىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار ماراپات تورىنەن كورىندى.
ايتا كەتەيىك، بۇگىندە وڭىرىمىزدە 30-دان استام ەتنوس وكىلدەرى تۇرادى. جەرلەستەرىمىز سىر ءوڭىرىنىڭ ەكونوميكا، مادەنيەت، سپورت، ءبىلىم، عىلىم سالالارىنىڭ دامۋىنا اتسالىسىپ، ەلىمىزدىڭ وركەندەۋىنە ۇلەس قوسۋدا.
تاتۋلىق پەن كەلىسىمنىڭ كيەلى شاڭىراعىنا اينالعان «دوستىق ۇيىندە» 11 ەتنومادەني بىرلەستىككە ارنالعان كابينەتتەر قاراستىرىلعان. قازاقستان حالقى اسسامبلەياسىنىڭ 30 جىلدىعىنا وراي كەشەندى ءىس-شارالار جوسپارى بەكىتىلگەن. جوسپارعا سايكەس 100-دەن استام ءىس-شارا ۇيىمداستىرىلادى. ءاربىر ەتنو-مادەني بىرلەستىكتىڭ ونكۇندىگى وتكىزىلىپ، ۇلتتىق-مادەني قۇندىلىقتار ناسيحاتتالادى.
