تاجىكستاندا ءۇش ۇكىمەتتىك ەمەس ۇيىم ەل پرەزيدەنتى ەمومالي راحموننىڭ ۇستىنەن گااگاداعى حالىقارالىق قىلمىستىق سوتقا شاعىم ءتۇسىردى. بۇل تۋرالى Pamir Inside جازدى، دەپ حابارلايدى «ادىرنا» ءتىلشىسى.
شاعىمدانعاندار قاتارىندا تاجىكستاندا تىيىم سالىنعان «يسلامنىڭ قايتا جاڭعىرۋى» پارتياسى، حالىقارالىق ەرىكتىلەر ۋكراينالىق قورى (FUVI) مەن Freedom For Eurasia قوعامدىق ۇيىمى بار. ولار ەل بيلىگىن ادامزاتقا قارسى قىلمىس جاسادى دەپ ايىپتاپ وتىر.
«11 ساۋىردە راحمونعا قارسى گااگا سوتىنا شاعىم تۇسىردىك. ول جاقىندا تاجىك حالقىنا جاساعان بارلىق قىلمىسى ءۇشىن جاۋاپ بەرەتىن بولادى»،—دەدى «يسلامنىڭ قايتا جاڭعىرۋى» پارتياسىنىڭ جەتەكشىسى مۋحيددين كابيري.
شەتەلدىك باق-تىڭ مالىمەتىنشە، شاعىمدا ازاپتاۋ، زورلاۋ، كىسى ءولتىرۋ، ەلدەن كۇشتەن كەتىرۋ سىندى باسقا دا قىلمىستار تۋرالى ايتىلادى. تاجىك وپپوزيتسياسى تەرگەۋدى باستاپ، كىنالىلەردى جازالاۋدى تالاپ ەتۋدە.
ايتا كەتەيىك، ازىرگە تاجىكستان بيلىگى بۇل جاعدايعا قاتىستى مالىمدەمە جاسامادى.
