ىشكى ىستەر مينيسترلىگى اتا-انالارعا ۇندەۋ جاسادى، دەپ حابارلايدى «ادىرنا» ءتىلشىسى.
مينيسترلىك مالىمەتىنشە، 23 ءجاسوسپىرىم ەسىرتكى قىلمىسى ءۇشىن ۇستالعان.
«قۇرمەتتى ازاماتتار! ءىىم ەسىرتكى قىلمىسىنا قارسى ءىس-قيمىل كوميتەتى كامەلەتكە تولماعانداردى ەسىرتكىنىڭ اينالىمىنا تارتۋ فاكتىلەرىنىڭ جالعاسۋىنا بايلانىستى الاڭداۋشىلىق بىلدىرەدى. بيىل ءۇش ايدا بۇكىل ەل بويىنشا تىيىم سالىنعان زاتتاردى ساقتاۋعا جانە تاراتۋعا قاتىسى بار دەگەن كۇدىكپەن 23 ءجاسوسپىرىم ۇستالدى. ولاردىڭ ىشىندە كوللەدجدەردىڭ ءبىرىنشى كۋرس ستۋدەنتتەرى مەن 9-11 سىنىپ وقۋشىلارى بار»،—دەلىنگەن حابارلامادا.
ءىىم زاڭدى بىلمەۋ جاۋاپكەرشىلىكتەن بوساتپايتىنىن اتاپ ءوتتى.
«ەسىرتكى قىلمىسى ءۇشىن قىلمىستىق جاۋاپكەرشىلىك 16 جاستان باستالادى. قازاقستان رەسپۋبليكاسىنىڭ قىلمىستىق كودەكسىنىڭ 296 جانە 297-باپتارىنا سايكەس ەسىرتكىنى ساقتاعانى جانە تاراتقانى ءۇشىن باس بوستاندىعىنان ايىرۋ جازاسى كوزدەلگەن. بۇدان باسقا، قىلمىستىق كودەكستىڭ 299-1-بابىندا ەسىرتكىنى، ونىڭ ىشىندە ينتەرنەت جانە الەۋمەتتىك جەلىلەر ارقىلى ناسيحاتتاۋ مەن جارنامالاۋ ءۇشىن قىلمىستىق جاۋاپكەرشىلىك قاراستىرىلادى. قۇرمەتتى اتا-انالار! سىزدەردى بالالارىڭىزدىڭ ورتاسىنا جانە ولاردىڭ بوس ۋاقىتىندا نە ىستەيتىنىنە ەرەكشە نازار اۋدارۋعا شاقىرامىز. قاۋىپتىڭ الدىن الۋ ماڭىزدى! بالالاردىڭ بولاشاعى ءبىزدىڭ قولىمىزدا! بىرلەسىپ قانا ەسىرتكىسىز، قاۋىپسىز قوعام قۇرا الامىز!»— دەپ تولىقتىردى ءىىم وكىلى قۋاندىق ءالجانوۆ.
