Ishki ister mınıstrligi ata-analarǵa úndeý jasady, dep habarlaıdy «Adyrna» tilshisi.
Mınıstrlik málimetinshe, 23 jasóspirim esirtki qylmysy úshin ustalǵan.
«Qurmetti azamattar! IIM esirtki qylmysyna qarsy is-qımyl komıteti kámeletke tolmaǵandardy esirtkiniń aınalymyna tartý faktileriniń jalǵasýyna baılanysty alańdaýshylyq bildiredi. Bıyl úsh aıda búkil el boıynsha tyıym salynǵan zattardy saqtaýǵa jáne taratýǵa qatysy bar degen kúdikpen 23 jasóspirim ustaldy. Olardyń ishinde kolledjderdiń birinshi kýrs stýdentteri men 9-11 synyp oqýshylary bar»,—delingen habarlamada.
IIM zańdy bilmeý jaýapkershilikten bosatpaıtynyn atap ótti.
«Esirtki qylmysy úshin qylmystyq jaýapkershilik 16 jastan bastalady. Qazaqstan Respýblıkasynyń Qylmystyq kodeksiniń 296 jáne 297-baptaryna sáıkes esirtkini saqtaǵany jáne taratqany úshin bas bostandyǵynan aıyrý jazasy kózdelgen. Budan basqa, Qylmystyq kodekstiń 299-1-babynda esirtkini, onyń ishinde ınternet jáne áleýmettik jeliler arqyly nasıhattaý men jarnamalaý úshin qylmystyq jaýapkershilik qarastyrylady. Qurmetti ata-analar! Sizderdi balalaryńyzdyń ortasyna jáne olardyń bos ýaqytynda ne isteıtinine erekshe nazar aýdarýǵa shaqyramyz. Qaýiptiń aldyn alý mańyzdy! Balalardyń bolashaǵy bizdiń qolymyzda! Birlesip qana esirtkisiz, qaýipsiz qoǵam qura alamyz!»— dep tolyqtyrdy IIM ókili Qýandyq Áljanov.
