13 sáýir, jeksenbi kúni Tájikstannyń shyǵysynda bolǵan jer silkinisiniń saldarynan úsh jasar bala qaza taýyp, 30-ǵa jýyq úı qırady, dep habarlaıdy "Adyrna" ulttyq portaly.
Bul týraly Tájikstannyń tótenshe jaǵdaılar jáne azamattyq qorǵanys komıtetiniń daǵdarys jaǵdaılaryn basqarý ortalyǵy málimdedi.
"Rasht aýdanynda bolǵan jerasty dúmpýleri saldarynan úsh jasar balany úıdiń qabyrǵasy basyp qalyp, kóz jumdy", – delingen habarlamada.
Jeksenbi kúni Tájikstannyń shyǵysynda úsh ret jer silkindi. Tájikstan seısmologtarynyń málimetinshe, birinshi silkinis jergilikti ýaqytpen 09:24-te, ekinshisi – 12:14-te, al úshinshisi – 13:33-te tirkelgen.
Eýropa-Jerorta teńizi seısmologııalyq ortalyǵynyń (EMSC) aqparatyna sáıkes, birinshi jer silkinisiniń magnıtýdasy – 5,9, ekinshisi – 4,2, úshinshisi – 4,7 bolǵan.
Barlyq jerasty dúmpýleri Dýshanbeden soltústik-shyǵysqa qaraı ornalasqan Rasht aýdany aýmaǵynda tirkelgen. Qashyqtyǵy el astanasynan shamamen 158–163 shaqyrym.
Jer silkinisi saldarynan barlyǵy 29 turǵyn úı men bir mektep qıraǵan. Qazirgi tańda zalaldy baǵalaý úshin tótenshe jaǵdaılar komıtetiniń arnaıy komıssııasy jumys isteýde.
Aıta keteıik, bul jer silkinisi Qazaqstannyń ońtústigindegi Astana, Taraz, Kentaý, Túrkistan sekildi 20-dan astam eldimekende, sondaı-aq Ózbekstan men Qyrǵyzstanda da sezilgen.
