Atyraý qalasynyń №2 soty zańsyz bekire balyǵy men ýyldyryq saqtaǵan turǵynǵa qatysty qylmystyq isti qarap, oǵan 3 jyl bas bostandyǵynan aıyrý jazasyn taǵaıyndady, dep habarlaıdy "Adyrna" ulttyq portaly oblystyq sottyń baspasóz qyzmetine silteme jasap.
Tergeý málimetinshe, 2024 jylǵy 17 tamyzda Atyraý qalasy turǵynynyń úıine tintý júrgizý barysynda shamamen 90 keli bekire balyǵy men 146 gramm bekire ýyldyryǵy tabylyp, tárkilengen.
Sotta aıyptalýshynyń kinási tintý hattamasy, sot-bıologııalyq jáne sot-taýar saraptamalarynyń qorytyndylary arqyly dáleldendi. Aıyptaýshy tarap aıyptalýshyǵa bas bostandyǵynan aıyrý jazasyn taǵaıyndaýdy surasa, sottalýshy men onyń qorǵaýshylary kerisinshe – aqtaýdy talap etken.
Sot úkimine sáıkes, QR QK 339-babymen ("Sırek kezdesetin jáne joıylyp ketý qaýpi bar janýarlarmen zańsyz aınalysý") kináli dep tanylyp, 3 jyl merzimge bas bostandyǵynan aıyryldy. Sonymen qatar, oǵan 5 jyl boıy atalǵan salada qyzmetpen aınalysýǵa tyıym salyndy.
Alaıda sot QR QK 74-babynyń 1-bóligine sáıkes, sottalýshynyń 14 jasqa tolmaǵan balalarynyń bolýyna baılanysty jazany óteý merzimin 3 jylǵa keıinge qaldyrdy.
Úkim áli zańdy kúshine engen joq.
