ميانمادا تاعى دا جەر سىلكىنىسى بولدى، دەپ حابارلايدى "ادىرنا" ۇلتتىق پورتالى ەۋروپا-جەرورتا تەڭىزى سەيسمولوگيالىق اگەنتتىگىنە (EMSC) سىلتەمە جاساپ.
بۇل جولى ميانما اۋماعىنداعى جەر سىلكىنىسىنىڭ ماگنيتۋداسى 5,5 بولعان.
سەيسميكالىق بەلسەندىلىك 13 ءساۋىر كۇنى استانا ۋاقىتىمەن 08:24-تە تىركەلگەن. جەر سىلكىنىسىنىڭ ەپيتسەنترى ماندالاي قالاسىنان وڭتۇستىككە قاراي شامامەن 92 شاقىرىم جەردە ورنالاسقان. ايتا كەتەيىك، ماندالاي – ميانماداعى حالىق سانى 1,2 ميلليونعا جۋىق ەكىنشى ءىرى قالا.
سونداي-اق جەر سىلكىنىسى حالقى 177 مىڭنان اساتىن مەيكتيلا قالاسىنان سولتۇستىك-شىعىسقا قاراي 34 شاقىرىم جەردە دە بايقالعان. جەر سىلكىنىسىنىڭ وشاعى 8 شاقىرىم تەرەڭدىكتە بولعان.
قازىرگى تاڭدا زارداپ شەككەندەر مەن قيراندىلار تۋرالى اقپارات جوق.
ەسكە سالا كەتەيىك، 28 ناۋرىزدا ميانمادا 7,7 ماگنيتۋدالى قۋاتتى جەر سىلكىنىسى تىركەلىپ، 29 ناۋرىزدا قايتادان قايتالانعان بولاتىن. جەر سىلكىنىسى سالدارىنان 2 700-دەن استام ادام قازا تاپتى. وسىعان بايلانىستى 31 ناۋرىز بەن 6 ءساۋىر ارالىعىندا ميانمادا ۇلتتىق ازا تۇتۋ كۇنى جاريالانعان بولاتىن.
