ۋكرايناعا قارسى سوعىستا رەسەي تاراپىندا جۇزدەن استام قىتايلىق جالدامالى اسكەر سوعىسىپ ءجۇر، دەپ حابارلايدى "ادىرنا" ۇلتتىق پورتالى Reuters اگەنتتىگىنە سىلتەمە جاساپ.
بۇل تۋرالى جۇما كۇنى اقش-تىڭ بارلاۋ مالىمەتتەرىمەن تانىس ەكى شەنەۋنىك جانە باتىس ەلدەرىنىڭ ءبىرىنىڭ بۇرىنعى بارلاۋشىسى مالىمدەگەن.
Reuters مالىمەتىنشە، بۇل جالدامالىلاردىڭ قىتاي حالىق رەسپۋبليكاسىنىڭ ۇكىمەتىمەن تىكەلەي بايلانىسى جوق. امەريكالىق شەنەۋنىكتەردىڭ ايتۋىنشا، بۇل قىتايلىق جاۋىنگەرلەردىڭ دايىندىعى تومەن، ءارى ولار رەسەيدىڭ اسكەري وپەراتسيالارىنا ەلەۋلى اسەر ەتىپ وتىرعان جوق.
باتىس بارلاۋ قىزمەتىنىڭ بۇرىنعى قىزمەتكەرى جالدامالىلاردىڭ ناقتى سانى شامامەن 200-گە جۋىق ەكەنىن اتاپ ءوتتى.
سونىمەن قاتار، اگەنتتىكتىڭ دەرەگىنە قاراعاندا، رەسەيدىڭ مايدان شەبىنەن تىس ايماقتارىندا قىتاي وفيتسەرلەرى سوعىس بارىسىنان تاكتيكالىق ساباق الىپ جاتىر.
Reuters دەرەككوزىنىڭ ايتۋىنشا، بۇل وفيتسەرلەردىڭ سول جەردە بولۋى – بەيجىڭنىڭ كەلىسىمىمەن جۇزەگە اسقان.
"ولار بۇل جەردە كەلىسىممەن جۇرگەنى – ءسوزسىز", – دەپ مالىمدەگەن اقپارات بەرۋشى.
