Qazaqstan Prezidentı Qasym-Jomart Toqaev Şymkent qalasyna sapary barysynda qolǧa alynyp jatqan salyq reformasy jaiynda pıkır bıldırdı. Būl turaly Aqorda jazdy, dep habarlaidy “Adyrna” ūlttyq portaly.
Prezidenttıŋ aituynşa, ükımet salyq saiasatyn qataŋdatpai, kerısınşe retke keltırmek.
«Qazırgı kodeks köp özgerıske ūşyraǧan. Zaŋǧa täueldı aktılerge jäne jekelegen jaǧdailarda basqaşa ereje qoldanatyn erekşelıkterge toly. Kodeks oqyp, tüsınuge qiyn qūjatqa ainalǧan. Sonyŋ saldarynan käsıpkerler men memlekettık qyzmetkerler ony ärqalai qabyldap, öz uäjderın alǧa tartady. Qaptaǧan jeŋıldıkter men salyq rejimderı käsıpkerlerdıŋ bır bölıgıne artyqşylyq berse, taǧy bırı oǧan narazy», – dedı Toqaev.
Prezidenttıŋ aituynşa bastapqyda salyq jeŋıldıgı ekonomikanyŋ belgılı bır salalary men biznestıŋ naqty sanattaryn qoldau maqsatynda engızılgen. Bıraq käsıpkerler jeŋıldıktı bas paidasyna jaratyp, salyqtan jaltaryp, biznesterın bölşektei bastaǧan.
«Mūndai jaǧdaiǧa bız jol bere almaimyz. Qazaqstan jappai ofşor aimaǧyna ainalyp ketpeuı kerek. Mūnyŋ bärı salyqty basqaru jüiesın kürdelendırıp, salyq jüktemesı ädıletsız bölınetın jaǧdaiǧa äkep soqty. Qazır Parlamentte müldem jaŋa Salyq kodeksı qaralyp jatyr. Atalǧan qūjat biznestıŋ de, memlekettıŋ de müddesın eskerıp, käsıpkerlerdı salyqty dūrys töleuge yntalandyruǧa tiıs. Qosymşa salyq tüsımderı damu biudjetın ūlǧaityp, jaŋa mektepter, auruhanalar jäne basqa da äleumettık nysandar saluǧa mümkındık beredı. Aşyq jäne tūraqty salyq jüiesı elımızdıŋ investisiialyq äleuetın küşeitedı», – dedı ol.
Qazaqstan ükımetı jaŋa Salyq kodeksın daiyndap, parlament qarauyna ūsyndy. 9 säuırde mäjılıs qūjatty bırınşı oqylymda maqūldady.
Soǧan säikes, qosylǧan qūn salyǧynyŋ mölşerın 16 paiyzǧa deiın köterıp, QQS-qa tırkeu şegın 40 mln teŋgege deiın tömendetu közdelgen. Iаǧni, jyldyq qarjy ainalymy 40 mln teŋgeden asatyn käsıpker qosylǧan qūn salyǧyn töleuı kerek bolady. Būl rette halyqqa qyzmet körsetetın käsıpkerlerge qosylǧan qūn salyǧy salynbaidy.
Odan bölek, 128 salyq jeŋıldıgı joiylyp, 3 qana salyq rejimı qalady.
