پرەزيدەنت قاسىم-جومارت توقاەۆ قازان ايىندا قازاقستان حالقىنا جولداۋ جاساپ، ەل دامۋىنىڭ الداعى جوسپارىن ايقىندايتىنىن مالىمدەدى، دەپ حابارلايدى "ادىرنا".
مەملەكەت باسشىسى ەلىمىزدىڭ تاريحي ورلەۋ داۋىرىنە قادام باسقانىن ايتىپ، سوڭعى ۋاقىتتا بولعان ەلەۋلى وزگەرىستەرگە توقتالدى.
ء"بىز ءبىرتۇتاس ەل بولىپ، اسا اۋقىمدى رەفورمالاردى تابىستى جۇزەگە اسىردىق. بارشا جۇرتىمىزعا، اسىرەسە وسكەلەڭ ۇرپاققا باعدار بەرەتىن كونستيتۋتسيامىزدى قابىلدادىق. ادىلەتتى، كۇشتى، وزىق، تازا قازاقستاننىڭ بەرىك نەگىزىن قالادىق. مۇنى ۇلت تاريحىنداعى ناعىز بەتبۇرىستى وقيعا دەپ باعالاۋعا بولادى. كونستيتۋتسيا – حالقىمىزدىڭ تەمىرقازىعى، ەل ىشىندەگى تۇبەگەيلى وزگەرىستەرگە تىڭ سەرپىن بەرگەن قاستەرلى قۇجات", – دەدى پرەزيدەنت.
قاسىم-جومارت توقاەۆ تاياۋدا قۇرىلتاي سايلاۋى ءوتىپ، ونىڭ قۇرامىنا كاسىبي، ىسكەر جانە جاڭاشىل ازاماتتار، سونىڭ ىشىندە كوپتەگەن جاس كىرگەنىن اتاپ ءوتتى.
"ۆيتسە-پرەزيدەنت تاعايىندالدى. جاڭارتىلعان ۇكىمەت جۇمىسىنا كىرىستى. قاۋىپسىزدىك كەڭەسىنىڭ اپپاراتى جاساقتالدى. كوپ ۇزاماي قازاقستان حالىق كەڭەسىنىڭ قۇرامى بەكىتىلەدى. قۇرىلتايدىڭ كەلىسىمىمەن كونستيتۋتسيالىق سوت سۋديالارى، ورتالىق سايلاۋ كوميسسياسى مەن جوعارى اۋديتورلىق پالاتانىڭ مۇشەلەرى تاعايىندالادى", – دەدى مەملەكەت باسشىسى.
پرەزيدەنت وسى قادامداردىڭ ناتيجەسىندە ەلىمىزدىڭ نەگىزگى مەملەكەتتىك ينستيتۋتتارى تولىق جاڭعىرتىلاتىنىن ايتتى. ونىڭ سوزىنشە، بۇل – اۋقىمدى رەفورمالاردىڭ اسا ماڭىزدى بولىگى.
"ال قازان ايىندا مەن كونستيتۋتسيانىڭ 46-بابىنا سايكەس قازاقستان حالقىنا جولداۋىمدى جاساپ، الداعى جوسپارىمىزدى ايقىندايمىن", – دەدى پرەزيدەنت.
قاسىم-جومارت توقاەۆ 2019 جىلى مەملەكەت باسشىسى بولىپ كەلگەلى حالىققا ارناعان جولداۋىن ۇنەمى قىركۇيەك ايىنىڭ باسىندا جاريالاپ كەلگەن بولاتىن.
