ۇلى وتان سوعىسىنداعى جەڭىستىڭ 80 جىلدىعى قارساڭىندا استانادا «مەنىڭ جەڭىس تاريحىم» اتتى پاتريوتتىق ونلاين-اكتسيا باستالدى، دەپ حابارلايدى ەلوردا اكىمدىگىنىڭ رەسمي سايتى.
«مەنىڭ جەڭىس تاريحىم» چەللەندجى اياسىندا ەلوردالىقتار الەۋمەتتىك جەلىدەگى جەكە پاراقشالارىندا سوعىسقا قاتىسقان تۋىستارىنىڭ وقيعالارىن، سونىمەن قاتار وتباسىلىق مۇراعات سۋرەتتەرىن، ەستەلىكتەرىن جاريالايدى.
قاتىسۋشىلار ۇلى وتان سوعىسىنا قاتىسقان جاقىندارىنا ارنالعان فوتوسۋرەتتەر مەن ۆيدەوروليكتەردى قىسقا اڭگىمەلەر نەمەسە ەستەلىك رەتىندە جاريالايدى.
چەللەندج اياسىندا سونىمەن قاتار مايداننان كەلگەن حاتتاردى، باتىرلاردىڭ ەرلىگى جايلى ولەڭدەرىن وقىپ، سوعىس جىلدارىنداعى اندەردى ورىنداي الادى.
بۇل چەللەندجدىڭ ماقساتى – سوعىسقا قاتىسقان جاقىندارى تۋرالى، سول سياقتى وتباسىلىق وقيعالار مەن مۇراعات ماتەريالدارىن تاراتۋ. بۇل وتكەندى ماڭگىلىك ساقتاۋعا جانە ۇلى وتان سوعىسىنىڭ باتىرلارىنا قۇرمەت كورسەتۋگە سەپتىگىن تيگىزەدى.
چەللەندجگە قوسىلۋ ارقىلى ءاربىر ادام ۇلى وتان سوعىسىنداعى جەڭىستىڭ 80 جىلدىعى قارساڭىندا تاريحتىڭ ساقتالۋىنا ۇلەس قوسىپ، بىرلىك رۋحىن قولداي الادى.
