اۋستريا رەسپۋبليكاسى ەۋروپا جانە حالىقارالىق ىستەر جونىندەگى فەدەرالدىق ءمينيسترى بەاتە ماينل-رايزينگەر رەسمي ساپارمەن استاناعا كەلدى، دەپ حابارلايدى "ادىرنا" ۇلتتىق پورتالى.
ساپار اياسىندا ول قازاقستاننىڭ سىرتقى ىستەر ءمينيسترى ەرمەك كوشەرباەۆپەن كەزدەستى.
تاراپتار كەڭەيتىلگەن قۇرامدا كەلىسسوزدەر وتكىزىپ، ەكىجاقتى ىنتىماقتاستىقتىڭ قازىرگى جاي-كۇيى مەن دامۋ پەرسپەكتيۆالارىن تالقىلادى. كەزدەسۋ بارىسىندا ەرمەك كوشەرباەۆ قازاقستان مەن اۋستريا اراسىنداعى ديپلوماتيالىق قاتىناستاردىڭ 1992 جىلدان بەرى تۇراقتى دامىپ كەلە جاتقانىن اتاپ ءوتتى.
ء"سىزدىڭ رەسمي ساپارىڭىز ۇزاقمەرزىمدى ارىپتەستىكتى نىعايتۋداعى ماڭىزدى قادام. بۇل ساياسي ديالوگىمىزعا جانە حالىقارالىق ۇيىمدارمەن ءوزارا ءىس-قيمىلىمىزعا جاڭا سەرپىن بەرەدى. بۇگىندە ءبىزدىڭ بايلانىستار ءوزارا سەنىم مەن ورتاق مۇددەلەرگە نەگىزدەلگەن", — دەدى مينيستر.
ول قازاقستاننىڭ اۋستريانى ماڭىزدى ەۋروپالىق سەرىكتەس رەتىندە قاراستىراتىنىن جانە ىنتىماقتاستىقتى ءارى قاراي دامىتۋعا مۇددەلى ەكەنىن جەتكىزدى.
ءوز كەزەگىندە بەاتە ماينل-رايزينگەر بۇل ساپار بۇرىن قول جەتكىزىلگەن كەلىسىمدەردىڭ جالعاسى ەكەنىن اتاپ ءوتتى.
ء"بىزدىڭ ىنتىماقتاستىعىمىز تۇراقتى دامىپ كەلەدى. بۇل ساپار اۋستريانىڭ قازاقستانمەن ارىپتەستىككە جوعارى ءمان بەرەتىنىن كورسەتەدى", — دەدى ول.
كەلىسسوزدەر بارىسىندا ينۆەستيتسيالىق ىنتىماقتاستىق، ينفراقۇرىلىمدىق جوبالار، سونىڭ ىشىندە ورتا ءدالىزدى دامىتۋ ماسەلەلەرى قارالدى. سونىمەن قاتار تاراپتار ەنەرگەتيكالىق قاۋىپسىزدىك جانە ەنەرگيا رەسۋرستارىن جەتكىزۋ باعىتىنداعى ءوزارا ءىس-قيمىلدى تالقىلادى.
