الماتىدا تمد ەلدەرىنىڭ سىرتقى ىستەر مينيسترلەرى باس قوستى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
رەسمي ءبولىم باستالماس بۇرىن دەلەگاتسيا مۇشەلەرىن قر پرەمەر-ءمينيسترىنىڭ ورىنباسارى — سىرتقى ىستەر ءمينيسترى مۇرات نۇرتىلەۋ قارسى الدى. ءىس-شارا ادەتەگىدەي ءداستۇرلى حاتتامالىق فوتوسەسسيادان باستالدى.
مۇرات نۇرتىلەۋ 2025 جىل دوستاستىققا قاتىسۋشى مەملەكەتتەردىڭ كەڭەسى جەڭىستىڭ 80 جىلدىعى بەلگىسىمەن ءوتىپ جاتقانىن جەتكىزدى. سۇراپىل سوعىس جىلدارىندا قازاقستاندىقتار ەرلىك پەن قاھارمان ۇلگىسىن كورسەتتى.
– قازاقستان ستراتەگيالىق تىل ايماعى رەتىندە ماڭىزدى ءرول اتقاردى. ءبىزدىڭ ەلدەن مايدانعا 1,2 ملن جاۋىنگەر اتتاندى، بۇل – رەسپۋبليكا حالقىنىڭ 25 پايىزى. ارميانى ازىق-تۇلىكپەن قامتاماسىز ەتتى. سوعىس جىلدارىندا مايدانعا 5 ملن توننادان استام نان، 800 مىڭ توننا ەت جونەلتىلدى. سونىمەن قاتار 10 وقتىڭ 9-ى ءبىزدىڭ ەلدىڭ قورعاسىنىنان قۇيىلدى. بۇل ءبىزدىڭ ورتاق جەڭىسىمىزگە - قازاقستاننىڭ قوسقان شىنايى ۇلەسى. سوندىقتان ءسوزىمدى جينالعان بارشا ارىپتەستەرىمدى كەلە جاتقان جەڭىس كۇنىمەن قۇتتىقتاپ، بەيبىتشىلىك، باقىت پەن بەرەكە تىلەۋدەن باستاعىم كەلەدى، – دەدى ول.
تمد ەلدەرىنىڭ سىرتقى ساياسي ۆەدومستۆولارىنىڭ باسشىلارى حالىقارالىق كۇن تارتىبىندەگى وزەكتى ماسەلەلەردى، ونىڭ ىشىندە ساياسي، ساۋدا-ەكونوميكالىق، مادەني-گۋمانيتارلىق سالالارداعى ىنتىماقتاستىقتىڭ جاي-كۇيى مەن پەرسپەكتيۆالارىن تالقىلايدى.
بۇدان بولەك، «ورتالىق ازيا – رەسەي» فورماتىنداعى سىرتقى ىستەر مينيسترلەرىنىڭ كەزەكتى كەزدەسۋى بولادى. ونىڭ اياسىندا ساۋدا-ەكونوميكالىق جانە ينۆەستيتسيالىق، كولىك-لوگيستيكا جانە مادەني-گۋمانيتارلىق سالالارىندا ءوڭىر ەلدەرىنىڭ ءوزارا ءىس-قيمىلى قارالماق.
سونداي-اق وتىرىس بارىسىندا دوستاستىققا مۇشە مەملەكەتتەردىڭ جەڭىستىڭ 80 جىلدىعىن مەرەكەلەۋگە دايىندىق بارىسىنا ەرەكشە نازار اۋدارىلادى.
سىرتقى ىستەر مينيسترىلىگىنىڭ ءباسپاسوز قىزمەتى ءمالىم ەتكەندەي، كەشە مۇرات نۇرتىلەۋ الماتى قالاسىنا جۇمىس ساپارىمەن كەلگەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆپەن كەلىسسوزدەر جۇرگىزدى.
ونىڭ بارىسىندا تاراپتار بيىك جانە جوعارى دەڭگەيدە قول جەتكىزىلگەن ۋاعدالاستىقتاردىڭ ورىندالۋ بارىسىن، سونداي-اق ساياسي، ساۋدا-ەكونوميكالىق، مادەني-گۋمانيتارلىق جانە وزگە دە سالالارداعى ەكىجاقتى ىنتىماقتاستىقتىڭ وزەكتى ماسەلەلەرىن پىسىقتادى.
ەسكە سالايىق، 10 ءساۋىر كۇنى قر پرەمەر-ءمينيسترىنىڭ ورىنباسارى — سىرتقى ىستەر ءمينيسترى مۇرات نۇرتىلەۋ مەن رەسەيدىڭ سىرتقى ىستەر ءمينيسترى سەرگەي لاۆروۆ باستاعان دەلەگاتسيا 28 پانفيلوۆشى ساياباعىنداعى ەكىنشى دۇنيەجۇزىلىك سوعىسىندا قازا تاپقاندار مەموريالىنا گۇل شوقتارىن قويدى.
