قازاقستاننىڭ سىرتقى ىستەر ءمينيسترى مۇرات نۇرتىلەۋ رەسەي فەدەراتسياسىمەن بىرلەسىپ اتوم ەلەكتر ستانتسياسىنىڭ (اەس) قۇرىلىسىن جۇزەگە اسىرۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
بۇل تۋرالى ول رەسەي سىرتقى ىستەر ءمينيسترى سەرگەي لاۆروۆپەن كەزدەسۋ بارىسىندا ايتتى.
«ينۆەستيتسيالىق جوبالارعا قاتىستى ايتار بولسام، قازىرگى تاڭدا بىزدە رەسەيلىك بيزنەس وكىلدەرىمەن بىرلەسكەن 170-تەن استام جوبا بار. سولاردىڭ ىشىندە ماڭىزدى جوبالاردىڭ ءبىرى رەتىندە قازاقستاندا اتوم ەلەكتر ستانتسياسىن سالۋ جوسپارلانىپ وتىر. بۇل باعىتتا سالالىق مينيسترلىكتەر ءتيىستى جۇمىس جۇرگىزەدى دەپ سەنەمىن»، – دەدى مينيستر نۇرتىلەۋ.
ەسكە سالايىق، 2023 جىلعى 6 قازاندا قازاقستاندا اەس قۇرىلىسىنا قاتىستى رەفەرەندۋم ءوتتى. ناتيجەسىندە 71,12% ازامات بۇل باستامانى قولداپ داۋىس بەردى. قۇرىلىس بويىنشا شورت-ليستكە ءتورت حالىقارالىق كومپانيا ەندى. ناقتىراق، قىتايدىڭ CNNC, وڭتۇستىك كورەيانىڭ KHNP, رەسەيدىڭ "روساتوم" جانە فرانتسيانىڭ EDF كومپانيالارى قۇرىلىسقا قاتىسادى.
ەنەرگەتيكا ۆيتسە-ءمينيسترى سۇڭعات ەسىمحانوۆتىڭ ايتۋىنشا، اەس قۇرىلىسىن جۇزەگە اسىراتىن كومپانيا بيىل ماۋسىم ايىندا بەلگىلى بولادى. بۇعان دەيىن پرەزيدەنت قاسىم-جومارت توقاەۆ بۇل جوبانى حالىقارالىق كونسورتسيۋم جۇزەگە اسىرۋى كەرەك ەكەنىن اتاپ وتكەن ەدى.
قازاقستانداعى العاشقى اتوم ەلەكتر ستانتسياسى الماتى وبلىسىنداعى ۇلكەن اۋىلىندا سالىنادى. ستانتسيا اۋماعىندا يندۋستريالىق ايماق قۇرىلىپ، قوسالقى كاسىپورىندار، الەۋمەتتىك نىساندار مەن قىزمەتكەرلەرگە ارنالعان ينفراقۇرىلىمدار دامىتىلادى. سونىمەن قاتار، اۋىلداعى جولدار مەن سۋ جۇيەسىن جاڭارتۋ تاپسىرىلعان.
ايتا كەتەيىك، پرەزيدەنت توقاەۆ ۇلتتىق قۇرىلتايدا سويلەگەن سوزىندە قازاقستاندا ءۇش اەس سالىناتىنىن جانە يادرولىق ەنەرگەتيكا اگەنتتىگى قۇرىلاتىنىن مالىمدەگەن بولاتىن.
