Qazaqstannyŋ syrtqy ıster ministrı Mūrat Nūrtıleu Resei Federasiiasymen bırlesıp atom elektr stansiiasynyŋ (AES) qūrylysyn jüzege asyruy mümkın ekenın mälımdedı, dep habarlaidy "Adyrna" ūlttyq portaly Kursivke sıltep.
Būl turaly ol Resei syrtqy ıster ministrı Sergei Lavrovpen kezdesu barysynda aitty.
«İnvestisiialyq jobalarǧa qatysty aitar bolsam, qazırgı taŋda bızde reseilık biznes ökılderımen bırlesken 170-ten astam joba bar. Solardyŋ ışınde maŋyzdy jobalardyŋ bırı retınde Qazaqstanda atom elektr stansiiasyn salu josparlanyp otyr. Būl baǧytta salalyq ministrlıkter tiıstı jūmys jürgızedı dep senemın», – dedı ministr Nūrtıleu.
Eske salaiyq, 2023 jylǧy 6 qazanda Qazaqstanda AES qūrylysyna qatysty referendum öttı. Nätijesınde 71,12% azamat būl bastamany qoldap dauys berdı. Qūrylys boiynşa şort-listke tört halyqaralyq kompaniia endı. Naqtyraq, Qytaidyŋ CNNC, Oŋtüstık Koreianyŋ KHNP, Reseidıŋ "Rosatom" jäne Fransiianyŋ EDF kompaniialary qūrylysqa qatysady.
Energetika vise-ministrı Sūŋǧat Esımhanovtyŋ aituynşa, AES qūrylysyn jüzege asyratyn kompaniia biyl mausym aiynda belgılı bolady. Būǧan deiın Prezident Qasym-Jomart Toqaev būl jobany halyqaralyq konsorsium jüzege asyruy kerek ekenın atap ötken edı.
Qazaqstandaǧy alǧaşqy atom elektr stansiiasy Almaty oblysyndaǧy Ülken auylynda salynady. Stansiia aumaǧynda industriialyq aimaq qūrylyp, qosalqy käsıporyndar, äleumettık nysandar men qyzmetkerlerge arnalǧan infraqūrylymdar damytylady. Sonymen qatar, auyldaǧy joldar men su jüiesın jaŋartu tapsyrylǧan.
Aita keteiık, Prezident Toqaev Ūlttyq qūryltaida söilegen sözınde Qazaqstanda üş AES salynatynyn jäne iadrolyq energetika agenttıgı qūrylatynyn mälımdegen bolatyn.
