10 ءساۋىر كۇنى تاڭعى ۋاقىتتا اباي وبلىسىندا ادام ولىمىمەن اياقتالعان اۋىر جول-كولىك وقيعاسى تىركەلدى، دەپ حابارلايدى "ادىرنا" ۇلتتىق پورتالى.
وبلىستىق پوليتسيانىڭ مالىمەتىنشە، تاڭعى ساعات 6 شاماسىندا 33 جاستاعى Volkswagen Passat كولىگىنىڭ جۇرگىزۋشىسى سەمەي قالاسىنان بورودۋليحا اۋىلىنا قاراي باعىت العان. الايدا جولدىڭ 16-شاقىرىمىندا رۋلگە يە بولا الماي، كولىك جول جيەگىنە ۇشىپ كەتكەن. اۆتوكولىك ورمان القابىنداعى اعاشتارعا سوعىلىپ، قاتتى سوققى سالدارىنان جۇرگىزۋشى وقيعا ورنىندا كوز جۇمدى.
«اپات سالدارىنان جۇرگىزۋشى العان جاراقاتتارىنان وقيعا ورنىندا قايتىس بولدى. وسى فاكتى بويىنشا قىلمىستىق كودەكستىڭ ءتيىستى بابىمەن سوتقا دەيىنگى تەرگەۋ باستالدى»، – دەلىنگەن پوليتسيا تاراتقان رەسمي مالىمەتتە.
قازىرگى تاڭدا وقيعانىڭ ءمان-جايى انىقتالىپ جاتىر. ساراپتامالار تاعايىندالعان.
