عىلىم كۇنى قارساڭىندا وتكەن عالىمدارمەن كەزدەسۋدە مەملەكەت باسشىسى قاسىم-جومارت توقاەۆ قازىرگى الەمدىك ەكونوميكالىق احۋالعا توقتالىپ، قازاقستانعا اسەر ەتۋى مۇمكىن سىن-قاتەرلەر تۋرالى ايتتى. بۇل تۋرالى Stan.kz اقپارات اگەنتتىگى حابارلادى.
پرەزيدەنتتىڭ ايتۋىنشا، قازىرگى تاڭدا الەم ونداعان جىل بويى بولماعان ەڭ كۇردەلى داعدارىستىڭ الدىندا تۇر.
“الپاۋىت مەملەكەتتەر اراسىنداعى “تاريف مايدانى” سالدارىنان ءوندىرىس پەن ساۋدا تىزبەگى بۇزىلىپ، نارىقتار قۇلدىراپ، شيكىزات باعامى تۇراقسىزدانىپ جاتىر. بۇل قازاقستانعا دا اسەر ەتپەي قويمايدى. قازىرگى تاڭدا 90 كۇندىك تاريف ءموراتوريى ەنگىزىلگەنىمەن، نارىقتاعى جاعداي ءالى دە تۇراقسىز”، – دەدى پرەزيدەنت توقاەۆ.
مەملەكەت باسشىسى احۋالعا ءپوزيتيۆتى كوزقاراسپەن قاراپ، دۇرلىگۋگە ەش نەگىز جوق ەكەنىن ايتتى.
“سىرتقى قولايسىز فاكتورلارعا قاراماستان، ءبىز دامۋدىڭ داڭعىل جولىن جالعاستىرا بەرەمىز. نەگىزگى ينفراقۇرىلىمدىق جوبالار مەن باسقا دا باستامالار تولىعىمەن جۇزەگە اسادى. ۇكىمەت پەن اكىمدىكتەرگە ءىس-قيمىل جوسپارىن شۇعىل اياقتاۋدى تاپسىردىم. بۇل – ءوسىم قارقىنى مەن ينۆەستيتسيا كولەمىن تومەندەتپەۋ ءۇشىن قاجەت”، – دەدى پرەزيدەنت.
سونداي-اق ول داعدارىستىڭ جاڭا مۇمكىندىكتەرگە جول اشاتىنىن، سونىمەن قاتار باسشىلىقتاعى ازاماتتاردىڭ ىسكەرلىك قابىلەتىن ايقىندايتىنىن اتاپ ءوتتى.
“ۇلتتىق ەكونوميكانىڭ ورنىقتىلىعى مەن الەۋمەتتىك تۇراقتىلىقتى ساقتاۋ ءۇشىن ءدال قازىر جان-جاقتى دايىندىق قاجەت. ءبىز جۇمىستى بايىپپەن ءارى سەنىمدى تۇردە اتقارۋعا ءتيىسپىز”، – دەدى پرەزيدەنت.
ايتا كەتەيىك، 3 ءساۋىر كۇنى اقش پرەزيدەنتى دونالد ترامپ 180-نەن استام ەلگە جاڭا سالىق تاريفتەرىن ەنگىزەتىنىن مالىمدەگەن بولاتىن. بۇل شەشىمنەن كەيىن ازيالىق قور نارىقتارى قۇلدىراي باستادى. كەيىن ترامپ تاريف ەنگىزۋدى كەيىنگە قالدىراتىنىن جەتكىزدى.
