امەريكالىق بارلاۋشىلاردىڭ بولجامىنا سەنسەك، ۋكراينادا سوعىس ءدال ەرتەڭ باستالۋى كەرەك.
كوپتەگەن اۋە كومپانيالارى ۋكراينا ۇستىمەن ۇشپاۋعا شەشىپ قابىلداپ، رەيستەرىن دوعارىپ جاتىر. ايتالىق، گوللانديالىق KLM اۋە كومپانياسى ۋكرايناعا اۆياتسيالىق رەيستەرىن توقتاتتى. ۋكراينانىڭ SkyUp چارتەرلىك اۋە كومپانياسى جەكسەنبى كۇنى ءوزىنىڭ مادەيرادان كيەۆكە اتتانعان ۇشاعىنىڭ مولدوۆا استاناسىنا بۇرىلعانىن حابارلادى. ۋكراينانىڭ «ۋكراەرورۋح» اۋە قوزعالىسى قاۋىپسىزدىگى اگەنتتىگى دە مالىمدەمە جاساپ، قارا تەڭىز اسپانىن «قاۋىپتى ايماق» دەپ جاريالاپ، ۇشاقتارعا 14-19 اقپان كۇندەرى وسى تەڭىزدىڭ ۇستىنەن ۇشۋدان اۋلاق بولۋعا كەڭەس بەردى.
كيەۆ اسكەريلەرى بولسا تويتارىس بەرۋگە ساقاداي ساي.
پرەزيدەنت ۆلاديمير زەلەنسكي حالقىنا ۇندەۋ جاريالاپ ۇلگەردى. ءتىپتى پرەزيدەنت دجو بايدەنمەن ءبىر ساعاتقا جۋىق سويلەسىپ، سەنىمدى قورعانىستا ەكەنىن جەتكىزدى.
ال بايدەن اكىمشىلىگى ءبۇي دەيدى، رەسەي سەيسەنبى كۇنى ۋكراينانىڭ شىعىسىندا جوسپارلانعان اسكەري جاتتىعۋلاردى نىساناعا الىپ، سوعىسقا كىرىسۋى ىقتيمال. بىراق بۇل ناقتى اقپار ەمەس.
بايدەننىڭ بايلامىنشا، ۋكراينا شەكاراسى ماڭىنا شوعىرلانعان رەسەيلىك كۇشتەردىڭ سانى 130 000-نان اسىپ كەتكەن. وتكەن اپتادا عانا ولاردىڭ قاتارى 100 مىڭنان اسپايتىن. الايدا زەلەنسكي ءپۋتيننىڭ باسقىنشىلىق ارەكەتكە باراتىنىنا كۇمانمەن قاراپ وتىر.
«رەسەيگە بۇل جەردە توسىن سىي جاساۋعا مۇمكىندىك بەرمەيمىز. ءبىز الەمگە كورگەن جايتتارىمىزدى مۇمكىندىگىنشە انىق ەتىپ بايانداۋدى ويلايمىز»، – دەدى اقش-تىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆان.
وداقتاسىمىز رەسەي تاراپى بولسا ۋكراينا ماڭىنا جانە بەلارۋسسياعا اسكەري كۇشتەرىن ورنالاستىرىپ الەك.
پۋتين بۇرىنعىسىنشا ۋكراينانى ناتو-عا كىرگىزبەۋدى تالاپ ەتسە، باتىس بۇل تالاپتاردى ورىنداۋعا ءۇزىلدى-كەسىلدى قارسى. ايتەۋىر كوك سارى بايراقتىلار «ەكى تۇيە سۇيكەنسە اراسىندا شىبىن ولەدىنىڭ» كۇيىن كەشپەسە بولعانى.
رەسەي باسىلىمدارىنىڭ سوزىنە قۇلاق تۇرسەك، بايدەن سوعىستى جەلەۋلەتىپ رەسەيگە ەداۋىر جاقىنداۋعا مۇددەلى كورىنەدى.
قىسقاسى، بولماعان ءىستى بولدى دەپ، ەلدىڭ ۇرەيىن ۇشىرماي ەرتەڭگى كۇندى كۇتەلىك!
ورالباي مەرگەنبايۇلى،
"ادىرنا" ۇلتتىق پورتالى
