Bas prokýrordyń orynbasary Ǵalymjan Qoıgeldıev Sherzat Polattyń otbasy úıiniń órtke oranýyna qatysty tergeý jumystary jóninde jańa málimettermen bólisti, dep habarlaıdy “Adyrna” ulttyq portaly.
Qoıgeldıevtiń aıtýynsha, atalǵan iske qatysty sotqa deıingi tergeý jumystary áli de jalǵasýda.
«Birqatar saraptamalar taǵaıyndalyp, olardyń nátıjeleri alyndy. Sonymen qatar, Reseı Federaııasyna halyqaralyq tergeý tapsyrmasy jiberildi», – dedi ol Senattaǵy brıfıng barysynda.
Bas prokýrordyń orynbasarynyń sózinshe, quqyq qorǵaý organdary seriktes elderden spýtnıktik sýretter arqyly oqıǵa bolǵan kúni Sherzattyń úıiniń mańynda qandaı kólikter turǵanyn anyqtaýǵa tyrysyp jatyr.
«Bul – istiń tolyqtyǵy úshin qajet. Sondyqtan ýaqyt kerek», – dep túsindirdi ol.
Eske sala keteıik, 2024 jylǵy 4 qazanǵa qaraǵan túni Talǵar qalasynda 16 jastaǵy Sherzat Polat dúkende ákesine kómektesip júrgende, agressıvti satyp alýshymen qaqtyǵys bolyp, arty jantúrshigerlik qylmysqa ulasqan. Kúdiktiler Sherzat pen onyń týystaryna pyshaq jáne ańshy myltyǵymen shabýyl jasaǵan. Oqıǵa ornynda Sherzat qaza tapty.
Keıin bul isti Ishki ister mınıstri Erjan Sadenov óz baqylaýyna alǵan edi. Jeti kúdikti ustalyp, olar eki aı merzimge qamaýǵa alynǵan.
Qaıǵyly oqıǵadan keıin Sherzat Polattyń otbasynyń úıi órtelip ketken bolatyn. Qazirgi ýaqytta tergeý organdary bul qylmystyń barlyq qyryn anyqtaýǵa kúsh salyp jatyr.
