بۇگىن تالدىقورعان قالاسىنداعى جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا شەرزات پولاتتىڭ ولىمىنە قاتىستى ءىس بويىنشا الدىن الا تىڭداۋ باستالدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
سوت وتىرىسىنا 9 سوتتالۋشى مەن ولاردىڭ قورعاۋشىلارى كەلدى. جوعارعى سوتتىڭ كوممۋنيكاتسيا ءبولىمىنىڭ مەڭگەرۋشىسى پەريزات سادۋاقاستىڭ ايتۋىنشا، ءىستى سۋديا ەرجان سەرىكقازىۇلى جانۇزاقوۆ قاراپ جاتىر.
جۋرناليستەر تاراپىنان سوتتىڭ ءدال وسى جەردە نە سەبەپتى ءوتىپ جاتقانى جونىندە سۇراقتار قويىلدى.
"بۇل — قىلمىستىق ءىس بولعاندىقتان، ءىستى قىلمىستىق ىستەر جونىندەگى اۋدانارالىق سوت قارايدى. اكىمشىلىك نەمەسە ازاماتتىق سوتتار مۇنداي ىستەردى قارامايدى", – دەپ ءتۇسىندىردى سۋديا سادۋاقاس.
ول سونداي-اق، كەڭىرەك زالدىڭ قاراستىرىلماعانى جونىندەگى جۋرناليستەردىڭ نارازىلىعىنا بايلانىستى، بۇل ۇسىنىستى جەرگىلىكتى سوت وكىلدەرىنە جەتكىزەتىنىن ايتتى. ونىڭ سوزىنشە، 9 سوتتالۋشى دا تالدىقورعانداعى تەرگەۋ يزولياتورىندا وتىرعاندىقتان، سوت وسى جەردە ءوتىپ جاتىر.
ايتا كەتەيىك، سوت وتىرىسى اشىق فورماتتا وتۋدە. الايدا، ايىپتالۋشىلاردىڭ ءبىرى – كامەلەتكە تولماعان ءجاسوسپىرىم بولعاندىقتان، سوت وكىلدەرى باق-تان ونىڭ بەينەسىن فوتو جانە ۆيدەوعا تۇسىرمەۋدى سۇرادى.
2024 جىلعى 4 قازاندا تالعار قالاسىندا بىرنەشە جىگىتتىڭ 16 جاستاعى شەرزات پولاتتى جابىلىپ سوققىعا جىعىپ، پىشاقتاپ ولتىرگەنى قوعامدا ۇلكەن رەزونانس تۋدىردى. كۋاگەرلەر وقيعانى ۆيدەوعا ءتۇسىرىپ، الەۋمەتتىك جەلىگە جۇكتەگەن. قوعام اراسىندا نارازىلىق كۇشەيىپ، وقيعانىڭ ءادىل تەرگەلۋىن تالاپ ەتكەندەر كوپ بولدى.
وقيعادان كەيىن 12 قازانعا قاراعان ءتۇنى مارقۇمنىڭ وتباسىنىڭ ءۇيى ورتەنىپ كەتتى. تۋىستارى مۇنى كۇدىكتى تاراپتىڭ قاساقانا جاساعان ارەكەتىمەن بايلانىستىرادى.
