تالدىقورعاندا پەتروگليفتەر تابىلعان تاۋدا جارىلىس جۇمىستارى قايتا باستالدى، دەپ حابارلايدى "ادىرنا" ءتىلشىسى.
بۇل تۋرالى قوعام بەلسەندىسى ولگا گۋميروۆا Facebook پاراقشاسىندا جازدى.
ونىڭ سوزىنشە تالدىقورعان ماڭىندا قىزىلتاس تاۋلارىنداعى پەتروگليفتەر بار. الايدا كونە جازۋلار، ەسكەرتكىشتەر تابىلعان تاۋدا "تەمىربەتون" سەرىكتەستىگى قايتا جارىلىس جۇمىستارىن باستاعان.
"جاقىندا تاسباقا ايماعىندا جارىلىستار بولدى، قالانى ءدۇر سىلكىندىرگەندەي جارىلىستار! ءبىزدىڭ ەرىكتىلەر جارىلىس بولعان جەردى تەكسەرىپ جاتىر. جارىلىس جۇمىستارىنىڭ ۇلكەن ەلدى مەكەنگە جاقىن جەردە، قالا شەكاراسىندا جۇرگىزىلىپ جاتقانىن ءبىرىنشى رەت ەستىپ تۇرمىن! بۇل جالپى قاۋىپسىزدىك ماقساتىندا قولايلى ما؟
اكىمدىك پەن مادەنيەت مينيسترلىگىنىڭ قىزمەتكەرلەرى «تەمىربەتون» كاسىپورنىنا ديوريت وندىرۋگە رۇقسات ەتىلگەن توبەدەن باسقا جەردە ەكەنىن ايتادى", - دەپ جازعان ول.
قوعام بەلسەندىسى ءاربىر پەتروگليفتەر ەل تاريحىنا قۇندى ەكەنىن ايتادى. سونداي-اق ول ءبىر شارا قابىلداۋ كەرەكتىگىن ايتادى.
"قىزىلتاس جوتاسىنىڭ پەتروگليفتەرى تاريح، ارحەولوگيا جانە الەۋمەتتىك مادەنيەت تۇرعىسىنان قىزىعۋشىلىق تۋدىرادى جانە قازاقستاننىڭ تاريحي-مادەني مۇراسى بولىپ تابىلادى.
قولا داۋىرىندە قالىپتاسا باستاعان ءبىرتۇتاس كەشەن بولعاندىقتان جانە بۇل پروتسەسس حح عاسىردىڭ باسىنا دەيىن جالعاسقان قىزىلتاس جوتاسىنىڭ جەكە بولىگى ەمەس، بۇكىل اۋماعىنا ارنايى ارحەولوگيالىق ساراپتاما جۇرگىزۋ قاجەت. قىزىلتاس جوتاسىنىڭ اۋماعىندا ورنالاسقان بارلىق ارحەولوگيالىق نىسانداردىڭ شەكاراسىن بەلگىلەپ، كۇزەت ايماقتارىن بەلگىلەپ، ءاربىر نىسانعا تىركەۋ كارتوچكالارىن دايىنداۋ قاجەت.
عىلىمي-زەرتتەۋ جۇمىستارى كەشەنى اياقتالعانعا دەيىن قىزىلتاس جوتاسىنىڭ اۋماعىندا شارۋاشىلىق قىزمەتتىڭ بارلىق تۇرلەرىن شەكتەۋ شارالارىن قابىلداۋ قاجەت.
جاڭادان تابىلعان پەتروگليفتەر مەن قىزىلتاس جوتاسىنىڭ ەلدى مەكەندەرىن جەرگىلىكتى ماڭىزى بار جەتىسۋ ءوڭىرىنىڭ تاريح جانە مادەنيەت ەسكەرتكىشتەرىن الدىن الا ەسەپكە الۋ تىزبەسىنە قوسۋ قاجەت", - دەيدى ولگا گۋميروۆا.
