مەملەكەت باسشىسى قاسىم-جومارت توقاەۆ YTO Express كومپانياسىنىڭ باسقارما توراعاسى يۋي حۋەيتسزياونى قابىلدادى. كەزدەسۋ بارىسىندا «قازپوشتا» اق مەن YTO Express كومپانياسى بىرلەسىپ قۇرعان «Qazpost – YTO» جشس-ءنىڭ قىزمەتى تانىستىرىلدى، دەپ حابارلايدى “ادىرنا” ۇلتتىق پورتالى اقورداعا سىلتەپ.
جوبانىڭ باستى ماقساتى – قازاقستان مەن ورتالىق ازيادا زاماناۋي ءارى ءتيىمدى كۋرەرلىك جەلى قالىپتاستىرۋ. وسى باعىتتا الماتى وبلىسىندا ءىرى سۇرىپتاۋ حابىنىڭ قۇرىلىسىن باستاۋ جوسپارلانىپ وتىر. بۇل پوشتا جونەلتىلىمدەرىن جەتكىزۋ مەرزىمىن ەداۋىر قىسقارتۋعا مۇمكىندىك بەرەدى.
سونىمەن قاتار، سۇرىپتاۋ حابىنا جاقىن ماڭنان يندۋستريالدى پارك سالۋ كوزدەلۋدە.
مەملەكەت باسشىسى مۇنداي بىرلەسكەن جوبالاردىڭ ستراتەگيالىق ماڭىزىنا توقتالىپ، ولاردىڭ ەلدەر مەن حالىقارالىق بيزنەس اراسىنداعى ءتيىمدى ىقپالداستىقتىڭ ۇلگىسىنە اينالۋى ءتيىس ەكەنىن اتاپ ءوتتى.
