تۇنگى ۋاقىتتا. اتىراۋ وبلىسىندا جەر سىلكىنىسى تىركەلدى

قازاقستاندىق سەيسمولوگتار اتىراۋ وبلىسى اۋماعىندا جەر سىلكىنىسىن تىركەدى، دەپ حابارلايدى “ادىرنا” ۇلتتىق پورتالى. قازاقستان ۇلتتىق دەرەكتەر ورتالىعىنىڭ جەدەل مالىمەتى بويىنشا، جەراستى دۇمپۋلەرى 10 ءساۋىر كۇنى ساعات 01:40-تا (استانا ۋاقىتىمەن) تىركەلگەن. جەراستى قوزعالىسىنىڭ ەپيتسەنترى كۇلسارى قالاسىنان وڭتۇستىك-شىعىسقا قاراي 120 شاقىرىم جەردە ورنالاسقان. سەيسميكالىق ءدۇمپۋدىڭ ماگنيتۋداسى — 4,3; ەنەرگەتيكالىق كلاسى — 9,1 بولعان. ازىرگە زارداپ شەككەندەر مەن قيراعان نىساندار تۋرالى اقپارات تۇسكەن جوق. ايتا كەتەيىك، بۇعان دەيىن 28 ناۋرىزعا قاراعان ءتۇنى جامبىل وبلىسىنىڭ بىرنەشە اۋدانىندا جەر سىلكىنىسى تىركەلىپ، مەركە اۋىلىندا 5 بالدىق، كۇلان اۋىلىندا 4 بالدىق، ال تاراز، شۋ، قورداي جانە مويىنقۇم اۋداندارىندا 2 بالدىق دۇمپۋلەر بايقالعان ەدى. سول كۇنى تۇستەن كەيىن تاعى ءبىر جەراستى قوزعالىسى ورىن العان. ەۋروپالىق جەرورتا تەڭىزى سەيسمولوگيالىق ورتالىعىنىڭ دەرەگى بويىنشا، ماگنيتۋداسى 5,0 جەر سىلكىنىسى مەركە اۋىلىنان وڭتۇستىك-باتىسقا قاراي 20 شاقىرىم جەردە تىركەلدى. جامبىل وبلىسىندا بولعان قوس سىلكىنىستىڭ سالدارىنان ەكى اۋداننىڭ 20-دان استام نىسانىنا زاقىم كەلگەن بولاتىن. قازىر وڭىردە سەيسميكالىق احۋالدى باقىلاۋ جانە تالداۋ جۇمىستارى جالعاسىپ جاتىر.