الماتىدا بەلگىلى ايتىسكەر اقىن بالعىنبەك يماشەۆتىڭ ۇلى – دانيار يماشەۆ الاياقتىق بابى بويىنشا تەرگەلىپ جاتىر، دەپ حابارلايدى "ادىرنا" ۇلتتىق bairaqmedia.kz پورتالىنا سىلتەمە جاساپ حابارلادى.
تەرگەۋگە دانيار يماشەۆتىڭ اتقارۋشى ديرەكتورى بولىپ سانالاتىن «Qazaq travel» كومپانياسىنىڭ قىزمەتىنە بايلانىستى 50-گە جۋىق ادامنىڭ شاعىمى سەبەپ بولعان. تۋريستەر قاسيەتتى مەككە قالاسىنا ۇشۋعا ءبىر كۇن قالعاندا ساپاردىڭ بولمايتىنى تۋرالى حابار العان. قازىر ولار اۋەزوۆ اۋداندىق پوليتسيا باسقارماسىنا ارىز ءتۇسىرىپ، اقشالارىن قايتارۋدى تالاپ ەتۋدە.
TikTok-تا marjuka92 ەسىمدى قولدانۋشى جاريالاعان ۆيدەودا اشۋلى جۇرت كومپانيا كەڭسەسىنە باسىپ كىرىپ، ونداعى جاعدايدى ءتۇسىرىپ كورسەتكەن. ونىڭ ايتۋىنشا، كومپانيا وكىلدەرى قاجىلىققا اپارامىز دەپ ۋادە بەرىپ، ادامداردان ميلليونداپ اقشا جيناعان، الايدا ساپار دا، اقشا دا جوق. ال كومپانيا ديرەكتورى ايتىسكەر اقىن بالعىنبەك يماشەۆتىڭ بالاسى ەكەن.
“11-شاعىن اۋدانداعى 3/1 مەكەنجايىنداعى كەڭسەگە كەلگەندە، ەشكىم جوق. قىزمەتكەرلەرگە ايلىق تا تولەنبەگەن. بۇل كومپانيانىڭ ديرەكتورى – تانىمال ايتىسكەر اقىن بالعىنبەك يماشەۆتىڭ ۇلى دانيار يماشەۆ. ول قولحات جازىپ، بەلگىلى ءبىر سومانى قايتارامىن دەپ ۋادە بەرگەنىمەن، ناتيجە جوق. الەۋمەتتىك جەلىدەگى پاراقشالارىندا پىكىر قالدىرۋ مۇمكىندىگىن جاۋىپ تاستاعان”، – دەيدى ۆيدەو اۆتورى.
تۋريست مەدينا جارىلعاپوۆا كومپانيا تاراپىنان ناقتى تۇسىنىكتەمە بولماعانىن، بيلەتتەر مەن قوناقۇي تولەمدەرى جايلى دالەل ۇسىنىلماعانىن ايتتى.
«Qazaq travel» كەڭسەسى قازىر جابىق. پوليتسيا الاياقتىق دەرەگى بويىنشا قىلمىستىق ءىس قوزعاپ، ءۇش كۇدىكتىنى انىقتاعان. ولاردىڭ اراسىندا دانيار يماشەۆ تا بار.
كومپانيا وكىلى بۇل وقيعاعا قاتىستى پىكىر بىلدىرمەگەنىمەن، ونىڭ اكەسى بالعىنبەك يماشەۆ ماسەلەنى تۇسىندىرۋگە تىرىستى. ول بيلەت پەن قوناقۇي باعاسىنىڭ كۇرت قىمباتتاۋى كومپانياعا قيىندىق تۋعىزعانىن ايتىپ، بۇل جاعدايدى الاياقتىق دەپ قابىلداماۋعا شاقىردى.
– كوپ ادامدار قاجىلىققا جەڭىلدىكپەن جازىلىپ قويعان. بىراق قازىر باعا قىمباتتاپ كەتتى. كومپانيانىڭ قۇرىلتايشىلارى تۋريستەردىڭ جاعدايىن جاساۋ ءۇشىن ءوز قالتاسىنان قوسىمشا قارجى سالىپ جاتىر، – دەدى ايتىسكەر اقىن.
الايدا قاجىلىققا بارا الماي قالعان ازاماتتار بۇعان سەنبەي، اقشالارىن قايتارۋدى تالاپ ەتۋدە. سونىمەن قاتار ولار مۇنداي جاعدايعا وزگە مۇسىلماندار تاپ بولماسا ەكەن دەيدى.
