«اق جول» دەموكراتيالىق پارتياسى سالىق كودەكسىن تالقىلاۋ بارىسىندا وندىرىسشىلەر مەن كاسىپكەرلەردىڭ مۇددەسىن قورعاي وتىرىپ، ۇكىمەتكە كونسترۋكتيۆتى وپپونەنت بولىپ كەلە جاتقانىن مالىمدەدى. پارتيا وكىلدەرى مەملەكەت مۇددەسى ءۇشىن ماڭىزدى شەشىمدەر قابىلداۋعا دايىن ەكەنىن دە اتاپ ءوتتى.
سالىق رەفورماسىنا قاتىستى نەگىزگى ۇستانىمدار:
نەگىزسىز جەڭىلدىكتەردى قىسقارتۋ: «اق جول» نارىقتاعى كەيبىر سۋبەكتىلەرگە باسەكەگە قابىلەتسىز ارتىقشىلىق بەرەتىن جەڭىلدىكتەردى ازايتۋدى قولدايدى. سونىمەن قاتار، بانكتەر، ءىرى ءوندىرۋشى كومپانيالار، ويىن بيزنەسى سەكىلدى جوعارى تابىستى سالالارعا سالىقتى ارتتىرۋدى ۇسىندى.
ققس مولشەرلەمەسىن سارالاۋ: فراكتسيا الەۋمەتتىك ماڭىزى بار تاۋارلار مەن قىزمەتتەرگە (ازىق-تۇلىك، ءدارى-دارمەك، كوممۋنالدىق تولەمدەر جانە ت.ب.) نولدىك ققس مولشەرلەمەسىن ەنگىزۋدى تالاپ ەتەدى. سونىمەن قاتار، باسىم تەحنولوگيالىق سالالار ءۇشىن (ماشينا جاساۋ، IT, فينتەح، ونەركاسىپتىك قۇرىلىس) ققس-تى 8% دەڭگەيىندە بەلگىلەۋدى ۇسىنادى.
شاعىن بيزنەسكە قولداۋ: ققس شەگىن جىلىنا 15 ملن تەڭگەگە دەيىن تومەندەتۋ — بيزنەستىڭ جابىلۋىنا نەمەسە كولەڭكەگە كەتۋىنە الىپ كەلەدى. وسىعان بايلانىستى فراكتسيا شەكتى دەڭگەيدى 78 ملن تەڭگە دەڭگەيىندە ساقتاۋدى ۇسىندى. 40 ملن تەڭگە كولەمىندەگى ۇسىنىستىڭ ءوزى جەتكىلىكسىز دەيدى ولار.
سالىق اكىمشىلەندىرۋى: زاڭدى تۇلعالارمەن جۇمىس ءۇشىن جەڭىلدەتىلگەن رەجيمگە ققس ەنگىزۋ بۋحگالتەريا مەن قوسىمشا ەسەپتەۋلەردى قاجەت ەتەتىنىن، بۇل شاعىن بيزنەس ءۇشىن اۋىرتپالىق ەكەنىن اتاپ ءوتتى.
ققس رەفورماسىن كەزەڭ-كەزەڭىمەن ەنگىزۋ: «اق جول» فراكتسياسى ققس مولشەرلەمەسىن جىل سايىن 1%-عا ۇلعايتا وتىرىپ، جاڭا فورماتتى بىرتىندەپ ەنگىزۋدى ۇسىنادى.
ۇكىمەتتىڭ شىعىندارىن قىسقارتۋ: پارتيا سالىقتىق وزگەرىستەردى بيۋدجەت شىعىستارىن ازايتۋمەن، اسىرەسە مەملەكەتتىك اپپارات پەن كۆازيمەملەكەتتىك سەكتوردىڭ شىعىندارىن قىسقارتۋمەن قاتار جۇرگىزۋ قاجەت ەكەنىن العا تارتادى. ولار ۇكىمەتتىڭ وسى باعىتتا ەشبىر ناقتى قىسقارتۋ جاساماعانىن سىنعا الدى.
فراكتسيا الداعى ۋاقىتتا 100-گە جۋىق ۇسىنىس نەگىزىندە جۇمىسىن جالعاستىرىپ، سالىق رەفورماسىنىڭ ءادىل ءارى ءتيىمدى بولۋىنا ىقپال ەتەتىنىن مالىمدەدى.
