سەيسەنبى كۇنى ءفيليپپيننىڭ ورتالىق بولىگىندە كانلاون جانارتاۋىنىڭ قۋاتتى اتقىلاۋى بولدى، دەپ حابارلايدى "ادىرنا" ۇلتتىق پورتالى.
بۇل تۋرالى ءفيليپپيننىڭ ۆۋلكانولوگيا جانە سەيسمولوگيا ينستيتۋتى (فۆيس) حابارلادى.
«قازىرگى ۋاقىتتا كانلاون شىڭىنداعى كراتەردەن جارىلىس تۇرىندەگى اتقىلاۋ بولىپ جاتىر، ول بۇگىن جەرگىلىكتى ۋاقىتپەن 05:51-دە باستالدى»، – دەدى راديوسۇحبات بارىسىندا فۆيس-ءتىڭ جانارتاۋلاردى باقىلاۋ جانە اتقىلاۋلاردى بولجاۋ ءبولىمىنىڭ جەتەكشىسى ماريا انتونيا بورناس.
اتقىلاۋ سالدارىنان «شامامەن 4 مىڭ مەتر بيىكتىككە دەيىن جەتەتىن كولەمدى يىلگەن بۇلت پايدا بولىپ، وڭتۇستىك-باتىسقا قاراي باعىت الىپ بارادى. پيروكلاستيكالىق اعىندار جانارتاۋدىڭ نەگىزگى وڭتۇستىك باۋرايىمەن تومەن قاراي جىلجىدى»، – دەپ تولىقتىردى فۆيس وكىلدەرى.
فۆيس جانە ينتەرنەت قولدانۋشىلار جاريالاعان ۆيدەولاردا اتقىلاپ جاتقان جانارتاۋدىڭ الىپ بۇلتتى اۋاعا لاقتىرعانى انىق كورىنەدى.
اتقىلاۋعا قاراماستان، ينستيتۋت قاۋىپ-قاتەر دەڭگەيىن كوتەرمەدى. ول ءالى دە بىلتىر جەلتوقسانداعى كانلاوننىڭ الدىڭعى اتقىلاۋىنان بەرى ءۇشىنشى دەڭگەيدە تۇر. بۇل – ماگمانىڭ جەر بەتىنە قاراي قوزعالىپ جاتقانىن بىلدىرەدى. جارىلىستار، لاۆا اتقىلاۋى مەن پيروكلاستيكالىق اعىنداردى قامتيتىن قاۋىپتى اتقىلاۋدىڭ ىقتيمالدىعى جوعارى ەكەنىن كورسەتەدى.
كانلاون – نەگروس ارالىندا، شىعىس جانە باتىس نەگروس پروۆينتسيالارىنىڭ شەكاراسىندا ورنالاسقان جانە فيليپپيندەگى ەڭ بەلسەندى 24 جانارتاۋدىڭ ءبىرى سانالادى.
