9 ساۋىردەن باستاپ قازاقستاندا جۇمىرتقا يمپورتىنا التى ايعا تىيىم سالىنادى، دەپ حابارلايدى "ادىرنا" ۇلتتىق پورتالى اۋىل شارۋاشىلىعى مينيسترلىگىنىڭ ءباسپاسوز قىزمەتىنە سىلتەمە جاساپ.
شەكتەۋ كەز كەلگەن كولىك تۇرىمەن ءۇشىنشى ەلدەردەن جانە ەۋرازيالىق ەكونوميكالىق وداق مەملەكەتتەرىنەن اكەلىنەتىن جۇمىرتقاعا قاتىستى بولادى.
تەك جۇمىرتقانىڭ قازاقستان اۋماعى ارقىلى ترانزيتتىك تاسىمالىنا عانا ەرەكشە جاعداي جاسالادى.
مينيسترلىك بۇل شەشىمدى كوكتەم-جاز كەزەڭىندە وتاندىق تاۋار وندىرۋشىلەردى قولداۋ ماقساتىمەن ءتۇسىندىردى.
«قازىر جۇمىرتقاعا دەگەن سۇرانىستىڭ تومەندەگەنى بايقالادى، نارىقتاعى قاجەتتىلىك تولىقتاي ونەركاسىپتىك ءوندىرىس پەن ءۇي شارۋاشىلىقتارىنىڭ بەلسەندى قاتىسۋى ەسەبىنەن جابىلىپ وتىر. بۇل فاكتور قۇس فابريكالارىنىڭ جۇمىسىنا كەرى اسەر ەتىپ، جۇمىرتقا باعاسىنىڭ تومەندەۋىنە اكەلۋدە. باعانىڭ وزىندىك قۇننان تومەندەۋى كاسىپورىنداردىڭ تابىستىلىعىنا تەرىس ىقپال ەتەدى»، — دەپ مالىمدەدى مينيسترلىك.
ءوندىرىس كولەمى ازايماعاندىقتان، تاۋار قويمالاردا جينالىپ قالادى. ال بۇل مەزگىلدە جۇمىرتقانىڭ ساقتاۋ مەرزىمى قىسقارادى.
