رەسەي باس پروكۋراتۋراسى مۇسىلماندار ءدىني باسقارماسىنىڭ 4 ايەل الۋ تۋرالى ءپاتۋاسىن وتباسى جانە نەكە تۋرالى زاڭعا قايشى كەلەدى دەپ تاپتى. بۇل تۋرالى رەسەي باسىلىمدارى جاريالادى، دەپ حابارلايدى “ادىرنا” ۇلتتىق پورتالى.
«مۇسىلماندار ءدىني باسقارماسى ەلدە كوپ ايەل الۋعا رۇقسات بەرەتىن «رەسەي مۇسىلمان قاۋىمىنداعى كوپ ايەل الۋ ماسەلەلەرى» تۋرالى ءپاتۋاسىن كەرى قايتارىپ الدى»، – دەپ جازعان باسىلىمدار.
بۇقارالىق اقپارات قۇرالدارىنىڭ حابارلاۋىنشا، باس پروكۋراتۋرا رەسەي مۇسىلماندارى ءدىني باسقارماسىنىڭ توراعاسىنا كوپ ايەل الۋعا رۇقسات بەرەتىن تەولوگيالىق قورىتىندىسىنا بايلانىستى ۇسىنىس بەرگەن. پروكۋراتۋرا زاڭدى نەكەدە تۇرعان ادامنىڭ باسقا اداممەن نەكەلەسۋىنە تىيىم سالىناتىنىن تۇسىندىرگەن. رەسەي فەدەراتسياسىنىڭ وتباسى كودەكسىنىڭ 14-بابىنا سايكەس، «كەم دەگەندە ءبىر ادام باسقا تىركەلگەن نەكەدە تۇرعان ادامدار» اراسىندا جاڭا نەكە تىركەۋگە جول بەرىلمەيدى.
باس پروكۋراتۋرانىڭ بۇل ۇسىنىسىنان كەيىن، ءدىني باسقارما ءپاتۋاسىن كەرى قايتارىپ العان.
ايتا كەتەيىك، 20 جەلتوقسان كۇنى رەسەي مۇسىلماندارىنىڭ ءدىني باسقارماسىنىڭ ورىنباسارى، ماسكەۋ قالاسىنىڭ ءمۇفتيى ەلدار الياۋتدينوۆ مۇسىلماندارعا ءتورت ايەلگە دەيىن ءدىني نەكە قيۋعا رۇقسات بەرىلەتىنى جونىندە ءپاتۋا شىعارىلعانىن مالىمدەگەن.
الايدا ءدىني باسقارمانىڭ بۇل شەشىمىن ادام قۇقىقتارى جونىندەگى كەڭەس مۇشەلەرى سىنعا الىپ، «رەسەي شاريعات زاڭى بويىنشا ءومىر سۇرەتىن ەلگە اينالماۋى كەرەك» دەگەن قارسىلىقتارىن جەتكىزگەن.
