قازاقستان رەسپۋبليكاسى مادەنيەت جانە اقپارات مينيسترلىگىنىڭ ارحيۆ، قۇجاتتاما جانە كىتاپ ءىسى كوميتەتى گەرالديكالىق جۇمىس باسقارماسى مەن «گەرالديكالىق زەرتتەۋلەر ورتالىعى» رمم-ءنىڭ ۇيىمداستىرۋىمەن «مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى» تاقىرىبىندا رەسپۋبليكالىق سەمينار ءوتتى.
ەكى كۇنگە سوزىلعان بۇل شاراعا ەلىمىزدىڭ بارلىق وڭىرلەرىنەن مەملەكەتتىك ورگانداردىڭ وكىلدەرى، سونداي-اق قازاقستان رەسپۋبليكاسى ىشكى ىستەر مينيسترلىگى مەن ساۋدا جانە ينتەگراتسيا مينيسترلىگىنىڭ ماماندارى، ءماجىلىس دەپۋتاتتارى مەن قوعام قايراتكەرلەرى قاتىستى.
سەميناردىڭ باستى ماقساتى – مەملەكەتتىك رامىزدەر مەن ۆەدومستۆولىق ماراپاتتاردىڭ جۇيەلەنۋىن قامتاماسىز ەتۋ، ولاردىڭ ناسيحاتتالۋىن كۇشەيتۋ، ۇلتتىق ستاندارتتار مەن زاڭ تالاپتارىنىڭ ورىندالۋىن قاداعالاۋ، سونداي-اق ادال ەڭبەك ەتكەن ازاماتتاردى ماراپاتتاۋ ءراسىمىن رەتكە كەلتىرۋ.
مەملەكەت باسشىسى بۇعان دەيىن ۇلتتىق قۇرىلتاي بارىسىندا گەرالديكا ماسەلەسىن بىرنەشە رەت كوتەرگەن بولاتىن. ماسەلەن، تۇركىستاندا وتكەن جيىندا وڭىرلىك نىشانداردى جۇيەلەۋ ماسەلەسى تالقىلانسا، بۋرابايداعى وتىرىستا ۆەدومستۆولىق ماراپاتتاردى رەتتەۋ تاپسىرىلعان ەدى.
سەمينار بارىسىندا وڭىرلىك نىشانداردى زاڭ تالاپتارىنا ساي بەكىتۋ، مەملەكەتتىك رامىزدەرگە قاتىستى قۇقىق بۇزۋشىلىقتاردى انىقتاۋ جانە ولارعا شارا قولدانۋ، مەملەكەتتىك رامىزدەردى پايدالانۋ ءتارتىبى مەن ۇلتتىق ستاندارتتاردىڭ ساقتالۋىن قامتاماسىز ەتۋ، سونداي-اق مەملەكەتتىك رامىزدەر كۇنىن لايىقتى دەڭگەيدە اتاپ ءوتۋ ماسەلەلەرى جان-جاقتى قاراستىرىلدى.
العاشقى كۇنى ارحيۆ، قۇجاتتاما جانە كىتاپ ءىسى كوميتەتى گەرالديكالىق جۇمىس باسقارماسىنىڭ باسشىسى گۇلدانا ارگەنوۆا پرەزيدەنت تاپسىرماسىنا سايكەس وڭىرلىك نىشانداردى بىرىزدەندىرۋ بويىنشا اتقارىلىپ جاتقان جۇمىستاردى باياندادى.
ىشكى ىستەر مينيسترلىگىنىڭ وكىلى ايدا باياليەۆا مەملەكەتتىك رامىزدەرگە قاتىستى قۇقىق بۇزۋشىلىقتاردى ۋاقىتىندا انىقتاۋ مەن ءتيىستى شارا قولدانۋ جونىندە بايانداما جاسادى. ال ساۋدا جانە ينتەگراتسيا مينيسترلىگىنىڭ مامانى قازبەك نۇربەك مەملەكەتتىك رامىزدەردىڭ ۇلتتىق ستاندارتتارعا سايكەستىگىنە توقتالدى.
سەميناردىڭ ەكىنشى كۇنى ءماجىلىس دەپۋتاتى ابزال قۇسپان مەملەكەتتىك رامىزدەرگە قاتىستى زاڭنامالىق وزگەرىستەر ەنگىزۋ جانە جاۋاپكەرشىلىكتى كۇشەيتۋ ماسەلەسىن كوتەردى. قازاقستان رەسپۋبليكاسىنىڭ مەملەكەتتىك ەلتاڭباسىنىڭ اۆتورى جانداربەك مالىبەكوۆ رامىزدەردىڭ ماڭىزدىلىعىن اتاپ ءوتىپ، وڭىرلىك نىشانداردى جۇيەلەۋ باستاماسىن قولدايتىنىن ءبىلدىردى.
سونىمەن قاتار تۇڭعىش ءرامىزتانۋشى ەربول شايمەردەنوۆتىڭ جارى، ۇستاز كۇلاش قايىرجانقىزى مەملەكەتتىك رامىزدەردى ازىرلەۋ كەزەڭىندەگى قيىندىقتار مەن ەستەلىكتەرىمەن ءبولىستى.
سەمينار سوڭىندا قاتىسۋشىلار ءوزارا پىكىر الماسىپ، ءىس-شاراعا بەلسەندى قاتىسقانى ءۇشىن سەرتيفيكاتتار مەن ەستەلىك سىيلىقتار الدى.
سەمينار قورىتىندىسى بويىنشا ۆەدومستۆولىق ناگرادالاردى جۇيەلەۋ جانە ولاردى ۇلتتىق گەرالديكالىق ستاندارتتارعا سايكەستەندىرۋ بويىنشا ناقتى ۇسىنىستار مەن ۇسىنىمدار ازىرلەندى. قاتىسۋشىلار ۆەدومستۆولىق جانە وڭىرلىك نىشانداردىڭ بىرىزدىلىكپەن راسىمدەلۋىن، ولاردىڭ كوركەمدىك جانە مازمۇندىق ساپاسىن ارتتىرۋدى، تاريحي-مادەني قۇندىلىقتارعا سايكەستىگىن قامتاماسىز ەتۋدىڭ ماڭىزدىلىعىن اتاپ ءوتتى. سونىمەن قاتار، سەمينار شەڭبەرىندە مەملەكەتتىك رامىزدەرگە قاتىستى زاماناۋي قاۋىپ-قاتەرلەر مەن ولاردى قورعاۋ جولدارى تالقىلاندى. اسىرەسە، تسيفرلىق كەڭىستىكتە رامىزدەردى زاڭسىز پايدالانۋدىڭ الدىن الۋ، ۆەدومستۆولىق ماراپاتتاردى تىركەۋ مەن ەسەپكە الۋ تەتىكتەرىن جەتىلدىرۋ، سونداي-اق رامىزدەردى ناسيحاتتاۋ جۇمىستارىنا زاماناۋي كوممۋنيكاتسيالىق قۇرالداردى كەڭىنەن ەنگىزۋ قاجەتتىگى كوتەرىلدى. سەميناردا ۇسىنىلعان ويلار مەن پىكىرلەر الداعى زاڭنامالىق جانە ادىستەمەلىك قۇجاتتاردى جەتىلدىرۋگە نەگىز بولادى دەپ كۇتىلۋدە. ۇيىمداستىرۋشىلار مۇنداي ءىس-شارالاردى تۇراقتى تۇردە وتكىزىپ تۇرۋ قاجەتتىگىن اتاپ ءوتتى.
