قىرعىزستاننىڭ مۇسىلماندار ءدىني باسقارماسى (مۋفتيات) ەلدەگى قوعامدىق ورىنداردا نيكاب كيۋگە ەنگىزىلگەن تىيىمدى قولدايتىنىن مالىمدەدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
بۇل تۋرالى ۆەدومستۆونىڭ رەسمي سايتىندا جاريالاندى.
ءمۇفتياتتىڭ تۇسىندىرۋىنشە، شاريعات بويىنشا مۇسىلمان ايەلدىڭ بەتى مەن قولىنان باسقا دەنەسىن جابۋى مىندەتتى. الايدا بەتتى تولىق جاباتىن نيكاب پارىز سانالمايدى. سوندىقتان ايەلدەرگە حيدجاب (ورامال) جانە كەڭ، جابىق كيىم كيۋ جەتكىلىكتى.
«نيقاب — قوعامىمىز ءۇشىن جات قۇبىلىس. قازىرگى جاعدايدا نيكاب كيگەن كەيبىرەۋلەردىڭ ارتىندا قوعامدىق قاۋىپسىزدىككە قاۋىپ توندىرەتىن ارام پيعىلدى ادامدار تۇرۋى مۇمكىن. سول سەبەپتى ادامنىڭ ءجۇزىنىڭ اشىق بولعانى ماڭىزدى»، – دەلىنگەن مالىمدەمەدە.
ءمۇفتيات ءدىني ماسەلەلەردى ساياساتقا ارالاستىرۋ، ارانداتۋ ارەكەتتەرىنە قولدانۋ يسلامدا كۇنا بولىپ سانالاتىنىن ەسكە سالدى.
نيقاب كيۋگە قاتىستى پىكىرتالاستار جالالاباد وبلىسىندا پوليتسيا كوشەدە بەت-ءجۇزىن جاۋىپ جۇرگەن ايەلدەرمەن ءتۇسىندىرۋ جۇمىستارىن جۇرگىزە باستاعاننان كەيىن ورشىگەن. قۇقىق قورعاۋشىلار ولارعا ارنايى جادىناما تاراتىپ، زاڭدى قايتا بۇزعان جاعدايدا 20 مىڭ سوم (شامامەن 230 دوللار) كولەمىندە ايىپپۇل سالىناتىنىن ەسكەرتكەن.
بۇل جاعدايعا قىرعىزستان پرەزيدەنتى سادىر جاپاروۆ تا پىكىر ءبىلدىرىپ، حيدجابتى (ورامال) ۇلتتىق كيىم رەتىندە اتادى.
«ورامال — انالارىمىز بەن اجەلەرىمىزدىڭ ءداستۇرلى باس كيىمى. كىمنىڭ قالاي تاعاتىنى — ءار ايەلدىڭ جەكە ءىسى. باستىسى — بەتى اشىق بولۋى كەرەك»، – دەدى ول.
پرەزيدەنتتىڭ ايتۋىنشا، نيكاب پەن پارانجا ەل داستۇرىنە جات ءارى ءدىني باسقارمانىڭ شەشىمىمەن تىيىم سالىنعان. بۇل — بيلىك ەمەس، ءمۇفتيات بەكىتكەن ەرەجە، مەملەكەت تەك ونىڭ ورىندالۋىن قامتاماسىز ەتەدى.
ەسكە سالايىق، 21 قاڭتاردا سادىر جاپاروۆ ءدىني سالانى رەتتەيتىن بىرقاتار زاڭعا قول قويعان. وندا جەكە تۇلعانى تانۋعا مۇمكىندىك بەرمەيتىن كيىمدەردى قوعامدىق ورىنداردا كيۋگە تىيىم سالۋ قاراستىرىلعان.
