Qyrǵyzstannyń musylmandar dinı basqarmasy (Mýftııat) eldegi qoǵamdyq oryndarda nıkab kııýge engizilgen tyıymdy qoldaıtynyn málimdedi, dep habarlaıdy “Adyrna” ulttyq portaly Ferǵanaǵa siltep.
Bul týraly vedomstvonyń resmı saıtynda jarııalandy.
Múftııattyń túsindirýinshe, sharıǵat boıynsha musylman áıeldiń beti men qolynan basqa denesin jabýy mindetti. Alaıda betti tolyq jabatyn nıkab paryz sanalmaıdy. Sondyqtan áıelderge hıdjab (oramal) jáne keń, jabyq kıim kııý jetkilikti.
«Nıqab — qoǵamymyz úshin jat qubylys. Qazirgi jaǵdaıda nıkab kıgen keıbireýlerdiń artynda qoǵamdyq qaýipsizdikke qaýip tóndiretin aram pıǵyldy adamdar turýy múmkin. Sol sebepti adamnyń júziniń ashyq bolǵany mańyzdy», – delingen málimdemede.
Múftııat dinı máselelerdi saıasatqa aralastyrý, arandatý áreketterine qoldaný ıslamda kúná bolyp sanalatynyn eske saldy.
Nıqab kııýge qatysty pikirtalastar Jalalabad oblysynda polıııa kóshede bet-júzin jaýyp júrgen áıeldermen túsindirý jumystaryn júrgize bastaǵannan keıin órshigen. Quqyq qorǵaýshylar olarǵa arnaıy jadynama taratyp, zańdy qaıta buzǵan jaǵdaıda 20 myń som (shamamen 230 dollar) kóleminde aıyppul salynatynyn eskertken.
Bul jaǵdaıǵa Qyrǵyzstan prezıdenti Sadyr Japarov ta pikir bildirip, hıdjabty (oramal) ulttyq kıim retinde atady.
«Oramal — analarymyz ben ájelerimizdiń dástúrli bas kıimi. Kimniń qalaı taǵatyny — ár áıeldiń jeke isi. Bastysy — beti ashyq bolýy kerek», – dedi ol.
Prezıdenttiń aıtýynsha, nıkab pen paranja el dástúrine jat ári dinı basqarmanyń sheshimimen tyıym salynǵan. Bul — bılik emes, múftııat bekitken ereje, memleket tek onyń oryndalýyn qamtamasyz etedi.
Eske salaıyq, 21 qańtarda Sadyr Japarov dinı salany retteıtin birqatar zańǵa qol qoıǵan. Onda jeke tulǵany tanýǵa múmkindik bermeıtin kıimderdi qoǵamdyq oryndarda kııýge tyıym salý qarastyrylǵan.
