قازاقستان رەسپۋبليكاسى باس پروكۋراتۋراسى مەملەكەت پايداسىنا 1,9 ميلليارد تەڭگە كولەمىندە اكتيۆتەردىڭ قايتارىلعانىن مالىمدەدى، دەپ حابارلايدى “ادىرنا” ۇلتتىق پورتالى Orda.kz-كە سىلتەپ.
اتالعان سومانىڭ ىشىندە «وپەراتور روپ» جشس-ءنىڭ سوتتالعان قىزمەتكەرلەرىنەن وندىرىلگەن قاراجاتتار مەن LRT جوباسىنا قاتىستى اكتيۆتەر بار. پروكۋراتۋرانىڭ العاشقى حابارلاماسىندا 2023 جىلى «وپەراتور روپ» ءىسى بويىنشا مەملەكەتكە ءبىر ميلليارد تەڭگە تاركىلەنىپ، قايتارىلعانى ايتىلعان. الايدا بۇل حابارلاما كەيىنىرەك ءوشىرىلدى.
سوعان قاراماستان، «استانا LRT» دەپ تانىلعان «City Transportation Systems» جشس-گە قاتىستى مالىمەتتەر وزگەرىسسىز قالدى. پروكۋراتۋرا وكىلدەرىنىڭ مالىمدەۋىنشە، كومپانيانىڭ قۇرىلتايشىسى – استانا قالاسىنىڭ اكىمدىگى، ال اكتيۆتەر مەملەكەتكە قايتارىلعان.
"مەملەكەتكە جالپى قۇنى 920 ميلليون تەڭگە بولاتىن 40 جىلجىمايتىن مۇلىك وبەكتىسى – 39 كوممەرتسيالىق عيمارات جانە 12,8 گەكتار اۋماقتاعى تەمىرجول ۋچاسكەسى بەرىلدى. بۇدان بولەك، قازىرگى ۋاقىتتا قۇنى 615 ميلليون تەڭگەگە باعالانعان 37 نىساندى قايتارۋ پروتسەسى ءجۇرىپ جاتىر", – دەلىنگەن رەسمي مالىمدەمەدە.
Orda.kz رەداكتسياسى «وپەراتور روپ» ىسىنە قاتىستى قايتارىلعان اكتيۆتەر جونىندە ناقتى تۇسىنىكتەمە الۋ ءۇشىن باس پروكۋراتۋراعا رەسمي ساۋال جولداعانىن حابارلادى.
باق بەتتەرىندە اكتيۆ قايتارعانداردىڭ قاتارىندا ءاليا نازارباەۆاعا تيەسىلى كومپانيالاردىڭ دا بار ەكەنى تۋرالى اقپارات تارادى.
ايتا كەتەيىك، اكتيۆتەردى قايتارۋ – ەلدە جۇرگىزىلىپ جاتقان زاڭسىز شىعارىلعان قاراجات پەن مۇلىكتى مەملەكەتكە قايتارۋ شارالارىنىڭ ءبىر بولىگى.
