ورال قالاسىنداعى جوعارى ينجەنەرلىك-تەحنولوگيالىق كوللەدجىندە جۇمىسشى ماماندىقتار جىلىنا ارنالعان ءىس-شارالار اياسىندا «تابيعات پەن تەحنولوگيانىڭ ۇيلەسىمى: بالىق شارۋاشىلىعى سالاسىنداعى سەرىكتەستىكتىڭ كەلەشەگى» اتتى تاقىرىپتا ماڭىزدى كەزدەسۋ ۇيىمداستىرىلدى. بۇل كەزدەسۋ بالىق شارۋاشىلىعى سالاسىنا قىزىعۋشىلىق تانىتقان ستۋدەنتتەر ءۇشىن ۇلكەن مۇمكىندىككە اينالدى.
ءىس-شاراعا «QOS OZEN» جاۋاپكەرشىلىگى شەكتەۋلى سەرىكتەستىگى مەن باتىس قازاقستان وبلىسىنىڭ جاستارمەن جۇمىس جونىندەگى رەسۋرستىق ورتالىعىنىڭ وكىلدەرى قاتىستى. كەزدەسۋدىڭ باستى ماقساتى – ستۋدەنتتەرگە بالىق شارۋاشىلىعى سالاسىنداعى زاماناۋي تەحنولوگيالار، وندىرىستىك ۇدەرىستەر جانە بولاشاقتاعى كاسىبي باعىتتار تۋرالى جان-جاقتى ماعلۇمات بەرۋ بولدى.
كەزدەسۋ بارىسىندا ستۋدەنتتەر وزدەرىنىڭ كاسىبي بولاشاعىنا بايلانىستى وزەكتى سۇراقتارىن قويىپ، سالا ماماندارىنان ناقتى ءارى پايدالى جاۋاپتار الدى. «QOS OZEN» جشس باسشىسى نۇرسەيتوۆ نۇربەك مۇساۇلى بالىق ءوسىرۋ، ونىڭ بيولوگيالىق ەرەكشەلىكتەرى، ەكولوگيالىق ماڭىزدىلىعى مەن ەكونوميكالىق تيىمدىلىگى جايىندا كەڭىنەن اڭگىمەلەدى. سونداي-اق، سالاداعى زاماناۋي تەحنولوگيالاردى ەنگىزۋ مەن اۆتوماتتاندىرۋ ۇردىستەرىنە دە ەرەكشە توقتالدى.
كەزدەسۋدىڭ ەڭ ماڭىزدى بولىگى – جوعارى ينجەنەرلىك-تەحنولوگيالىق كوللەدجى مەن «QOS OZEN» جشس اراسىندا ىنتىماقتاستىق تۋرالى مەموراندۋمعا قول قويىلۋى بولدى. بۇل كەلىسىم تەڭدىك پەن ءوزارا تيىمدىلىك قاعيداتتارىنا نەگىزدەلە وتىرىپ، قازاقستاننىڭ بالىق شارۋاشىلىعى سالاسى ءۇشىن جوعارى بىلىكتى كادرلار دايارلاۋعا باعىتتالعان.
مەموراندۋم اياسىندا كوللەدج ستۋدەنتتەرىنىڭ كاسىپتىك پراكتيكاسىن ۇيىمداستىرۋ، ارنايى پاندەر وقىتۋشىلارىنا وندىرىستىك تاعىلىمدامادان وتۋگە مۇمكىندىك جاساۋ، كوللەدج تۇلەكتەرىن تىكەلەي جۇمىسپەن قامتۋعا ىقپال ەتۋ، بالىق شارۋاشىلىعى سالاسىنداعى عىلىمي-زەرتتەۋ جوبالارى مەن يننوۆاتسيالىق باستامالاردى بىرلەسە جۇزەگە اسىرۋ بويىنشا ناقتى جۇمىستار جۇرگىزۋ كوزدەلىپ وتىر:
بۇل ىنتىماقتاستىق ستۋدەنتتەرگە ءوز ءبىلىمىن تاجىريبە ارقىلى نىعايتۋعا، ال كاسىپورىنعا – بولاشاق مامانداردى ەرتەرەك تانىپ، دايارلاۋعا مۇمكىندىك بەرەدى. سونىمەن قاتار، بۇل سەرىكتەستىك ەكولوگيا مەن اۋىل شارۋاشىلىعىنىڭ ماڭىزدى سالالارىنىڭ ءبىرى بولىپ تابىلاتىن بالىق شارۋاشىلىعىنىڭ تۇراقتى دامۋىنا ۇلەس قوسادى.
ءىس-شاراعا قاتىسقان ستۋدەنتتەر مەن وقىتۋشىلار ءۇشىن كەزدەسۋ وتە پايدالى ءارى شابىتتاندىرۋشى بولدى. ولار ءوز ماماندىقتارىنىڭ ماڭىزدىلىعىن تەرەڭ ءتۇسىنىپ، ەڭبەك نارىعىنداعى سۇرانىس پەن كاسىبي مۇمكىندىكتەر تۋرالى ناقتى كوزقاراس قالىپتاستىردى.
ايتا كەتۋ كەرەك، جوعارى ينجەنەرلىك-تەحنولوگيالىق كوللەدجى بۇگىنگى تاڭدا «بالىق شارۋاشىلىعى» ماماندىعى بويىنشا 200-دەن استام تۇلەكتى تۇلەپ ۇشىرعان. بۇل تۇلەكتەر ەلىمىزدىڭ تۇكپىر-تۇكپىرىندە جانە شەتەلدەردە بالىق شارۋاشىلىعى سالاسىندا تابىستى ەڭبەك ەتۋدە. ولاردىڭ كوپشىلىگى ءوز كاسىبىن دوڭگەلەتىپ، سالانىڭ دامۋىنا ءوز ۇلەسىن قوسىپ ءجۇر. بۇل كوللەدجدىڭ ساپالى ءبىلىم بەرىپ قانا قويماي، تۇلەكتەرىنىڭ ەڭبەك نارىعىنداعى باسەكەگە قابىلەتتىلىگىن ارتتىرا الاتىنىن كورسەتەدى.
جوعارى ينجەنەرلىك-تەحنولوگيالىق كوللەدجى الداعى ۋاقىتتا دا ءتۇرلى وندىرىستىك مەكەمەلەرمەن تىعىز بايلانىس ورناتىپ، بولاشاق مامانداردى ەڭبەك نارىعىنا ساپالى دايىنداۋدى جالعاستىرا بەرمەك.
