6 ءساۋىر كۇنى اۋدان ورتالىعىندا «اۋىل — بەرەكە مەن بىرلىكتىڭ قاينار كوزى» اتتى ءى اۋىلنايلار فورۋمى ءوتتى. فورۋمعا اۋدان اكىمى اسلانبەك سارقۇلوۆ، اۋداندىق ءماسليحات توراعاسى سارسەنباي مولداشەۆ، اۋدان اكىمىنىڭ ورىنباسارلارى، ءبولىم جانە مەكەمە باسشىلارى، وكرۋگ اكىمدەرى مەن ەلدى مەكەندەردىڭ اۋىلنايلارى قاتىستى.
اۋدانىمىزدا العاش رەت ۇيىمداستىرىلىپ وتىرعان فورۋمنىڭ كۇن تارتىبىندە اۋىلنايلاردىڭ جۇمىسىن جەتىلدىرۋ، اۋدانىمىزدا اتقارىلىپ جاتقان جۇمىستار، ەلدى مەكەندەردىڭ الەۋەتىن ارتتىرۋ ماسەلەلەرى تالقىلاندى.
اۋدان اكىمى اسلانبەك سارقۇلوۆ فورۋمدا سويلەگەن سوزىندە اۋقىمدى ءىس-شارانىڭ مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىمەن ۇشتاسىپ وتىرعانىن اتاپ ءوتتى.
— كازتالوۆ اۋدانى بويىنشا ەلدى-مەكەندەردىڭ اۋىلنايلارىنىڭ ماقساتى مەن مىندەتتەرىن ايقىنداپ، الداعى جوسپارلاردى تالقىلاۋ ماقساتىندا جينالىپ وتىرمىز. پرەزيدەنتىمىز «شىن مانىندە «حالىق ۇنىنە قۇلاق اساتىن مەملەكەت» پەن ادىلەتتى قوعام قۇرۋ جولىندا ءوزارا ىنتىماقتاستىق ماڭىزدى ءرول اتقارادى»، دەگەن بولاتىن. بۇگىنگى فورۋم ازاماتتىق قوعام قالىپتاستىرۋدىڭ ايقىن كورىنىسى. اۋىلنايلار جەرگىلىكتى اكىمدىكپەن، دەپۋتاتتارمەن، قوعامدىق كەڭەس مۇشەلەرى، كاسىپكەرلەر، شارۋا قوجالىقتار جانە اۋىل تۇرعىندارىمەن تىعىز بايلانىستا جۇمىس ىستەيدى. ونىڭ قىزمەتى اۋىلدىق جەرلەردىڭ وركەندەۋىنە جانە تۇرعىنداردىڭ ءال-اۋقاتىن ارتتىرۋعا باعىتتالعان، — دەگەن اۋدان اكىمى اۋىلنايلارعا كۋالىك تابىس ەتتى.
اۋدانىمىزدا 47 ەلى مەكەن، 16 وكرۋگ وتالىعى بار. وكرۋگ ورتالىقتارىنان بولەك 31 ەلدى-مەكەندە اۋىلنايلار بەلگىلەنىپ جۇمىستارىن اتقارىپ كەلەدى. اۋىلدىق وكرۋگتەردەگى جانە ەلدى مەكەندەگى قاۋىمداستىقتىڭ جينالىستارىنىڭ حاتتامالارى نەگىزدە ءار اۋىلدان اۋىلنايلار ۇسىنىلدى.
فورۋمدا ءسوز العان اۋدان اكىمىنىڭ ورىنباسارى سەرىك قايىرليەۆ اۋىلنايدىڭ قىزمەتى مەن مىندەتتەرىنە، يدەولوگيالىق باعىتتا اتقارىلىپ جاتقان جۇمىستارعا توقتالسا، اۋدان اكىمىنىڭ ورىنباسارى ايدار مەنەەۆ اۋداننىڭ الەۋمەتتىك-ەكونوميكالىق دامۋى جونىندە باياندادى. سەرىك ەربولاتۇلى ءوز سوزىندە قوعامدىق ءتارتىپ جانە تۇرمىستىق قاۋىپسىزدىكتى قامتاماسىز ەتۋ، دەسترۋكتيۆتى ءدىني اعىمداردىڭ الدىن الۋ، جاستارمەن بىرگە جۇمىس اتقارىپ، قوعامدىق شارالار مەن الەۋمەتتىك قولداۋ شارالارىنا بەلسەنە اتسالىسۋعا، اۋىلدى وركەندەتۋگە، مەملەكەتتىك باعدارلامالارعا قاتىسۋعا شاقىردى.
— اۋدانىمىزدىڭ الەۋمەتتىك-ەكونوميكالىق دامۋى، قوعامنىڭ ساياسي تۇراقتىلىعى، حالىقتىڭ بىرلىگى مەن ىنتىماعى – ءبارىمىز ءۇشىن باستى قۇندىلىق. قوعامدىق ءتارتىپتى ساقتاۋ، جاستاردى دۇرىس تاربيەلەۋ، حالىقتىڭ ءال-اۋقاتىن جاقسارتۋ – اۋىل اكىمدەرىنىڭ، دەپۋتاتتاردىڭ ءدان ءار اۋىلنايدىڭ نەگىزگى مىندەتى. قوعامدى الەۋمەتتىك جاعىنان قولداپ، ينفراقۇرىلىمدى دامىتۋ جانە مادەني قۇندىلىقتاردى ساقتاۋ – اۋىلدارىمىزدىڭ وركەندەۋىنە تىكەلەي ىقپال ەتەدى. ارقايسىمىز ءوز اۋىلىمىزدىڭ دامۋىنا جاۋاپتىمىز! بىرلەسىپ جۇمىس جاساپ، اۋدانىمىزدىڭ الەۋمەتتىك احۋالىن جاقسارتۋعا اتسالىسايىق!، — دەدى ول.
جيىندا جاڭاجول اۋىلدىق وكرۋگىنىڭ ءابىش اۋىلىنىڭ اۋىلنايى ابات سارسەنوۆ، بولاشاق اۋىلدىق وكرۋگىنىڭ كوپكۇتىر اۋىلىنىڭ اۋىلنايى ارتۋر داۋلەتوۆ، قاراسۋ اۋىلدىق وكرۋگىنىڭ جۇلدىز اۋىلىنىڭ اۋىلنايى جانبولات احمەتقاليەۆ، قاراوبا اۋىلدىق وكرۋگىنىڭ قونىسباي اۋىلىنىڭ اۋىلنايى نۇرحات ەگىزوۆ، كازتالوۆ اۋىلدىق وكرۋگىنىڭ قونىس ەلدى مەكەنىنىڭ اۋىلنايى ءادىل حايرۋللين ءسوز سويلەپ، باستاماعا قولداۋ ءبىلدىردى.
— بۇقار جىراۋ بابامىز «اۋىلدا ادام بار بولسا — اۋىل ادا بولمايدى، ەل يەسى بار بولسا — ەلى الا بولمايدى»، - دەگەن. بۇگىندە 58 اۋلالى اۋىلىمىزدا مەملەكەتتىڭ قولداۋىمەن جانە اۋىل ازاماتتارىنىڭ باستاماسىمەن ءبىراز ىلكىمدى ىستەر اتقارىلۋدا. الدىمەن اۋىلدىڭ حالىق سانىن ارتتىرۋ، مەكتەپتىڭ جابىلىپ قالۋ قاۋپىنىڭ الدىن الۋ ماقساتىنداعى جانە اۋىلدى دامىتۋعا باعىتتالعان «قالادان-اۋىلعا» باعدارلاماسىن اتاپ وتكىم كەلەدى. جالپى وتكەن جىلى اۋىلىمىزدا 6 ءۇي بوي كوتەردى. ونىڭ 2-ءۋى «قالادان-اۋىلعا» باعدارلاماسىمەن كوشىپ كەلگەن وتباسىلارعا بەرىلسە، 2-ءۋى تۇرعىن ءۇي كەزەگىندەگى وتباسىلارعا بەرىلدى. جەكە ەكى ءۇي سالىندى. جالپى حالىقتىڭ ءال-اۋقاتىن ارتتىرۋعا باعىتتالعان يگى باعدارلامالار ءۇشىن مەملەكەت باسشىسى قاسىم-جومارت كەمەلۇلىنا، مەملەكەتتىك باعدارلامالاردان اۋىلىمىزدى دا نازاردان تىس قالدىرماي، تىزىمگە قوسىپ، جۇيەلى جۇمىستار اتقارعانى ءۇشىن ءوڭىر جانە اۋدان باسشىلىعىنا العىسىمىز شەكسىز. بۇگىنگى فورۋم وتە جوعارى دەڭگەيدە وتۋدە. مەن بۇل فورۋم جەرگىلىكتى اتقارۋشى ورگان مەن ەلدى مەكەندەردىڭ اۋىلنايلارىنىڭ پىكىر الاڭىنا اينالادى دەپ سەنەمىن. «كەڭەسكەن ەلدە كەمدىك جوق» دەگەندەي اۋىلداعى ماسەلەنى بىرلەسىپ شەشىپ، اۋىلدى بىرگە دامىتۋعا، وركەندەتۋگە كۇش سالايىق!، — دەگەن اۋىلناي جاڭا مەكتەپ سالۋ، تازا اۋىز سۋمەن قامتاماسىز ەتۋ، ينتەرنەت جەلىسىنىڭ قاجەتتىلىگى سىندى اۋىلداعى وزەكتى ماسەلەلەردى اتاپ ءوتتى.
فورۋم اياسىندا اۋدانداعى تۇيتكىلدى ماسەلەلەر دە تالقىلاندى. سونىمەن قاتار ەلدى مەكەندەردىڭ الەۋەتىن ارتتىرۋ ماقساتىندا «ۇزدىك اۋىل»، «ۇزدىك اۋىلناي» سىندى جوبالاردى جۇزەگە اسىرۋ، اۋىلنايلار اراسىندا سەمينار ۇيىمداستىرۋ جونىندە ۇسىنىستار ايتىلدى.
وتكەن جىلى ءوڭىر باسشىسى ناريمان تورەعاليۇلىنىڭ باستاماسىمەن جۇزەگە اسقان «قالادان-اۋىلعا» باعدارلاماسىن اۋداندا جۇزەگە اسىرۋدا ۇزدىك ناتيجە كورسەتكەن بولاشاق جانە تالدىاپان اۋىلدىق وكرۋگتەرىنىڭ اكىمدىكتەرىنە جاڭا اۆتوكولىكتىڭ كىلتى تابىستالدى.
