6 sáýir kúni aýdan ortalyǵynda «Aýyl — bereke men birliktiń qaınar kózi» atty I aýylnaılar forýmy ótti. Forýmǵa aýdan ákimi Aslanbek Sarqulov, aýdandyq máslıhat tóraǵasy Sarsenbaı Moldashev, aýdan ákiminiń orynbasarlary, bólim jáne mekeme basshylary, okrýg ákimderi men eldi mekenderdiń aýylnaılary qatysty.
Aýdanymyzda alǵash ret uıymdastyrylyp otyrǵan forýmnyń kún tártibinde aýylnaılardyń jumysyn jetildirý, aýdanymyzda atqarylyp jatqan jumystar, eldi mekenderdiń áleýetin arttyrý máseleleri talqylandy.
Aýdan ákimi Aslanbek Sarqulov forýmda sóılegen sózinde aýqymdy is-sharanyń Memleket basshysynyń «Halyq únine qulaq asatyn memleket» tujyrymdamasymen ushtasyp otyrǵanyn atap ótti.
— Kaztalov aýdany boıynsha eldi-mekenderdiń aýylnaılarynyń maqsaty men mindetterin aıqyndap, aldaǵy josparlardy talqylaý maqsatynda jınalyp otyrmyz. Prezıdentimiz «Shyn máninde «Halyq únine qulaq asatyn memleket» pen ádiletti qoǵam qurý jolynda ózara yntymaqtastyq mańyzdy ról atqarady», degen bolatyn. Búgingi forým azamattyq qoǵam qalyptastyrýdyń aıqyn kórinisi. Aýylnaılar jergilikti ákimdikpen, depýtattarmen, qoǵamdyq keńes músheleri, kásipkerler, sharýa qojalyqtar jáne aýyl turǵyndarymen tyǵyz baılanysta jumys isteıdi. Onyń qyzmeti aýyldyq jerlerdiń órkendeýine jáne turǵyndardyń ál-aýqatyn arttyrýǵa baǵyttalǵan, — degen aýdan ákimi aýylnaılarǵa kýálik tabys etti.
Aýdanymyzda 47 eli meken, 16 okrýg otalyǵy bar. Okrýg ortalyqtarynan bólek 31 eldi-mekende aýylnaılar belgilenip jumystaryn atqaryp keledi. Aýyldyq okrýgterdegi jáne eldi mekendegi qaýymdastyqtyń jınalystarynyń hattamalary negizde ár aýyldan aýylnaılar usynyldy.
Forýmda sóz alǵan aýdan ákiminiń orynbasary Serik Qaıyrlıev aýylnaıdyń qyzmeti men mindetterine, ıdeologııalyq baǵytta atqarylyp jatqan jumystarǵa toqtalsa, aýdan ákiminiń orynbasary Aıdar Meneev aýdannyń áleýmettik-ekonomıkalyq damýy jóninde baıandady. Serik Erbolatuly óz sózinde qoǵamdyq tártip jáne turmystyq qaýipsizdikti qamtamasyz etý, destrýktıvti dinı aǵymdardyń aldyn alý, jastarmen birge jumys atqaryp, qoǵamdyq sharalar men áleýmettik qoldaý sharalaryna belsene atsalysýǵa, aýyldy órkendetýge, memlekettik baǵdarlamalarǵa qatysýǵa shaqyrdy.
— Aýdanymyzdyń áleýmettik-ekonomıkalyq damýy, qoǵamnyń saıası turaqtylyǵy, halyqtyń birligi men yntymaǵy – bárimiz úshin basty qundylyq. Qoǵamdyq tártipti saqtaý, jastardy durys tárbıeleý, halyqtyń ál-aýqatyn jaqsartý – aýyl ákimderiniń, depýtattardyń dán ár aýylnaıdyń negizgi mindeti. Qoǵamdy áleýmettik jaǵynan qoldap, ınfraqurylymdy damytý jáne mádenı qundylyqtardy saqtaý – aýyldarymyzdyń órkendeýine tikeleı yqpal etedi. Árqaısymyz óz aýylymyzdyń damýyna jaýaptymyz! Birlesip jumys jasap, aýdanymyzdyń áleýmettik ahýalyn jaqsartýǵa atsalysaıyq!, — dedi ol.
Jıynda Jańajol aýyldyq okrýginiń Ábish aýylynyń aýylnaıy Abat Sarsenov, Bolashaq aýyldyq okrýginiń Kópkútir aýylynyń aýylnaıy Artýr Daýletov, Qarasý aýyldyq okrýginiń Juldyz aýylynyń aýylnaıy Janbolat Ahmetqalıev, Qaraoba aýyldyq okrýginiń Qonysbaı aýylynyń aýylnaıy Nurhat Egizov, Kaztalov aýyldyq okrýginiń Qonys eldi mekeniniń aýylnaıy Ádil Haırýllın sóz sóılep, bastamaǵa qoldaý bildirdi.
— Buqar jyraý babamyz «Aýylda adam bar bolsa — aýyl ada bolmaıdy, El ıesi bar bolsa — eli ala bolmaıdy», - degen. Búginde 58 aýlaly aýylymyzda memlekettiń qoldaýymen jáne aýyl azamattarynyń bastamasymen biraz ilkimdi ister atqarylýda. Aldymen aýyldyń halyq sanyn arttyrý, mekteptiń jabylyp qalý qaýpiniń aldyn alý maqsatyndaǵy jáne aýyldy damytýǵa baǵyttalǵan «Qaladan-aýylǵa» baǵdarlamasyn atap ótkim keledi. Jalpy ótken jyly aýylymyzda 6 úı boı kóterdi. Onyń 2-ýi «Qaladan-aýylǵa» baǵdarlamasymen kóship kelgen otbasylarǵa berilse, 2-ýi turǵyn úı kezegindegi otbasylarǵa berildi. Jeke eki úı salyndy. Jalpy halyqtyń ál-aýqatyn arttyrýǵa baǵyttalǵan ıgi baǵdarlamalar úshin Memleket basshysy Qasym-Jomart Kemelulyna, memlekettik baǵdarlamalardan aýylymyzdy da nazardan tys qaldyrmaı, tizimge qosyp, júıeli jumystar atqarǵany úshin óńir jáne aýdan basshylyǵyna alǵysymyz sheksiz. Búgingi forým óte joǵary deńgeıde ótýde. Men bul forým jergilikti atqarýshy organ men eldi mekenderdiń aýylnaılarynyń pikir alańyna aınalady dep senemin. «Keńesken elde kemdik joq» degendeı aýyldaǵy máseleni birlesip sheship, aýyldy birge damytýǵa, órkendetýge kúsh salaıyq!, — degen aýylnaı jańa mektep salý, taza aýyz sýmen qamtamasyz etý, ınternet jelisiniń qajettiligi syndy aýyldaǵy ózekti máselelerdi atap ótti.
Forým aıasynda aýdandaǵy túıtkildi máseleler de talqylandy. Sonymen qatar eldi mekenderdiń áleýetin arttyrý maqsatynda «Úzdik aýyl», «Úzdik aýylnaı» syndy jobalardy júzege asyrý, aýylnaılar arasynda semınar uıymdastyrý jóninde usynystar aıtyldy.
Ótken jyly óńir basshysy Narıman Tóreǵalıulynyń bastamasymen júzege asqan «Qaladan-aýylǵa» baǵdarlamasyn aýdanda júzege asyrýda úzdik nátıje kórsetken Bolashaq jáne Taldyapan aýyldyq okrýgteriniń ákimdikterine jańa avtokóliktiń kilti tabystaldy.
