لوس-اندجەلەستە كينويندۋستريا سالاسىنىڭ جۇزدەگەن قىزمەتكەرى، اكتەرلەر مەن پروديۋسەرلەر ميتينگىگە شىقتى. ولار كاليفورنيا بيلىگىنەن سالىقتىق جەڭىلدىكتەردى كوبەيتىپ، فيلمدەر مەن تەلەحيكايالار ءتۇسىرۋ ءۇشىن قولايلى جاعداي جاساۋدى تالاپ ەتىپ وتىر، دەپ حابارلايدى «ادىرنا» ءتىلشىسى Reuters-كە سىلتەمە جاساپ.
نارازىلىق بىلدىرۋشىلەردىڭ ايتۋىنشا، جوبالاردىڭ باسقا شتاتتارعا كەتۋىن توقتاتىپ، ءوندىرىستى گولليۆۋدقا كەرى قايتارۋ كەرەك.
«گولليۆۋد ەشقايدا كەتپەيدى» دەپ ويلاۋ — قاتە تۇسىنىك. قازىرگى ءۇردىستى توقتاتپاساق، لوس-اندجەلەستىڭ دەترويتقا اينالۋ قاۋپى (2013 جىلى قالا اكىمدىگى ءوزىن بانكروت دەپ جاريالادى — رەد.) بار»،—دەدى امەريكالىق رەجيسسەر سارا ادينا سميت.
ايتۋىنشا، گولليۆۋد — تەك قىزىل كىلەمدە ءجۇرىپ وتەتىن جۇلدىزداردىڭ عانا ەمەس، سونداي-اق قازىر جۇمىسىنان ايىرىلىپ جاتقان مىڭداعان ورتا تاپ وكىلىنىڭ مەكەنى. ولاردىڭ قاتارىندا ارلەۋشىلەر، جارىقتاندىرۋ ماماندارى جانە تاعى باسقالارى بار.
ال 25 جىل بويى فيلمدەردىڭ ساۋندترەگىن جازىپ جۇرگەن مۋزىكانت سونگا لي ءبىر جىل ىشىندە ءوزى قاتىسقان جوبالار سانىنىڭ 30-دان 10-عا دەيىن ازايعانىن مالىمدەدى.
«بۇرىن ادامدار الەمنىڭ تۇكپىر-تۇكپىرىنەن تۇراقتى جۇمىسقا ورنالاسۋ ءۇشىن لوس-اندجەلەسكە كەلەتىن. ەگەر
مۇندا جۇمىس بولماسا، ەشكىم كەلمەيتىن بولادى. ءبىز قازىردىڭ وزىندە تالانتتى ادامداردى جوعالتا باستادىق»،—دەپ ءتۇسىندىردى ونەر يەسى.
كاليفورنيا گۋبەرناتورى گەۆين نيۋوم كينو جانە تەلەديدار ءوندىرىسى ءۇشىن سالىقتىق نەسيە قورىن جىلىنا 330 ميلليون دوللاردان 750 ميلليون دوللارعا دەيىن ۇلعايتۋدى ۇسىندى. نارازىلىق بىلدىرۋشىلەر بۇل باستامانى قولدايتىندارىن، الايدا قاراجاتتى ۇلعايتۋ كەرەكتىگىن اتاپ ءوتتى. واردىڭ پىكىرىنشە، بيلىك تە تۇسىرىلىمگە رۇقسات الۋ پروتسەسىن جەڭىلدەتىپ، ستۋديالارعا قوسىمشا ىنتالاندىرۋلار شارالارىن ۇسىنۋى كەرەك.
