بۇگىن — قازاق تاريحىنداعى تۇڭعىش كاسىپقوي بالۋان قاجىمۇقان مۇڭايتپاسوۆتىڭ تۋعان كۇنى، دەپ حابارلايدى «ادىرنا» ءتىلشىسى.
ول 1871 جىلى 7 ساۋىردە اقمولا وبلىسىنىڭ قاراوتكەل اۋىلىندا دۇنيەگە كەلگەن. قاجىمۇقان قىپشاقتىڭ التىباس رۋىنان شىققان.
قاجىمۇقان جاستايىنان بايلارعا جالدانىپ، اۋىر جۇمىس ىستەگەن. سول كەزدە باتپاققا باتىپ قالعان وگىزدى جالعىز ءوزى تارتىپ شىعارىپ العانى تۋرالى اڭگىمەلەر دە بار. ول 17 جاسقا تولماي جاتىپ، مىقتى پالۋان رەتىندە تانىلا باستادى. ونىڭ اقمولا وبلىسى بويىنشا بارلىق اتاقتى پالۋانداردى جەڭگەنى تۋرالى اڭگىمە بۇكىل قازاق دالاسىنا تەز تاراپ كەتەدى. ال 18 جاسىندا ونى تسيرككە جۇمىسقا شاقىردى.
پالۋان بابامىز الەمنىڭ 54 مەملەكەتىندە ونەر كورسەتىپ، 48 مەدال جەڭىپ العان. يۆان پوددۋبنىي، يۆان شەمياكين، يۆان زايكين، الەكس ابەرگ، گەورگ لۋريح، پول پونس، ۆەيلاند شۋلتس سىندى بالۋاندارمەن بىرگە بوز كىلەمدى سارعايتقان.
ايتا كەتەيىك، مۇڭايتپاسۇلى تۇراتىن ۇيدە قوناقتا بولعان فيلولوگ-عالىم اۋەلبەك قوڭىراتباەۆ پالۋاننىڭ فيزيكالىق ولشەمدەرىن جازىپ العان. سول كەزدە 75 جاستاعى پالۋان جالاڭاش تۇرعاندا 174 كەلى تارتقان. شالبارىنىڭ وزىنە ءۇش مەتر ماتا، كويلەگىنە 6 مەتر سۇرىپ كەتەدى ەكەن.
