سولتۇستىك كورەياداعى پحەنيان حالىقارالىق مارافونىنا شەتەلدىك سپورتشىلار دا قاستىستى، دەپ حابارلايدى "ادىرنا" ۇلتتىق پورتالى Deutsche Welle باسىلىمىنا سىلتەمە جاساپ.
بۇل – 2019 جىلدان بەرى العاش رەت شەتەلدىك جۇگىرۋشىلەردىڭ جارىسقا قاتىسۋى. قىتاي مەن رۋمىنيا سەكىلدى ەلدەردەن كەلگەن شامامەن 200 شەتەلدىك سپورتشى جەرگىلىكتى قاتىسۋشىلارمەن بىرگە سولتۇستىك كورەيا استاناسىنىڭ كوشەلەرىمەن جۇگىردى.
2019 جىلى بۇل مارافونعا 950-گە جۋىق شەتەلدىك قاتىسقان. COVID-19 پاندەمياسى باستالعالى سولتۇستىك كورەيا شەكاراسىن تولىقتاي جاۋىپ، وتە باياۋ تۇردە قايتا اشىپ جاتىر.
مارافون كحدر نەگىزىن قالاۋشى كيم ير سەننىڭ تۋعان كۇنىنە (15 ءساۋىر 1912 جىل) ارنالعان باستى مەملەكەتتىك مەرەكەلەردىڭ بىرىنە وراي ۇيىمداستىرىلدى. ول – قازىرگى ەل باسشىسى كيم چەن ىننىڭ اتاسى.
«پحەنيان مارافونى – ەرەكشە تاجىريبە، سەبەبى ول جەرگىلىكتى تۇرعىندارمەن ارالاسۋعا سيرەك مۇمكىندىك بەرەدى. سولتۇستىك كورەيا – كۇردەلى ءارى قىزىقتى ەل. ارينە، ول بارىنە جارامايدى، بىراق بۇل جابىق قوعامعا ەنىپ، ءوز كوزىڭمەن كورگىسى كەلەتىندەر ءۇشىن تاپتىرماس ورىن»، – دەدى مارافونعا ساياحات ۇيىمداستىراتىن پەكيندىك Koryo Tours كومپانياسىنىڭ باسشىسى سايمون كوكەرەلل.
جارىس كيم ير سەن ستاديونىندا باستالىپ، سول جەردەن قالا كورنەكىلىكتەرىن اينالىپ ءوتىپ، قالادان تىس ايماقتارعا دەيىن سوزىلعان مارشرۋت بويىنشا ءوتىپ، قايتا سول ستاديوندا اياقتالدى. جارىسقا 50 مىڭ كورەرمەن جينالدى.
پحەنيان مارافونى – World Athletics (دۇنيەجۇزىلىك جەڭىل اتلەتيكا قاۋىمداستىعى) سايتىندا كورسەتىلگەن سولتۇستىك كورەياداعى ەڭ ءىرى حالىقارالىق سپورتتىق شارا.
مۇنداي ءىس-شارالارعا قاراماستان، كحدر يادرولىق باعدارلاماسى، زىمىران سىناقتارىنا قاتىستى كەلىسىمدەردى ءجيى بۇزۋى، حيميالىق قارۋ قورى جانە رەسەيدىڭ ۋكرايناداعى سوعىسىن قولداۋى سەبەپتى حالىقارالىق وقشاۋلانۋدا قالىپ وتىر.
توتاليتارلى ءارى جابىق مەملەكەتكە كوپتەگەن حالىقارالىق سانكتسيالار سالىنعان. Amnesty International سەكىلدى قۇقىق قورعاۋ ۇيىمدارىنىڭ ايتۋىنشا، ەلدەگى ادام قۇقىقتارىنىڭ جاعدايى الەمدەگى ەڭ ناشار دەڭگەيدە.
