Soltústik Koreıadaǵy Phenıan halyqaralyq marafonyna sheteldik sportshylar da qastysty, dep habarlaıdy "Adyrna" ulttyq portaly Deutsche Welle basylymyna silteme jasap.
Bul – 2019 jyldan beri alǵash ret sheteldik júgirýshilerdiń jarysqa qatysýy. Qytaı men Rýmynııa sekildi elderden kelgen shamamen 200 sheteldik sportshy jergilikti qatysýshylarmen birge Soltústik Koreıa astanasynyń kóshelerimen júgirdi.
2019 jyly bul marafonǵa 950-ge jýyq sheteldik qatysqan. COVID-19 pandemııasy bastalǵaly Soltústik Koreıa shekarasyn tolyqtaı jaýyp, óte baıaý túrde qaıta ashyp jatyr.
Marafon KHDR negizin qalaýshy Kım Ir Senniń týǵan kúnine (15 sáýir 1912 jyl) arnalǵan basty memlekettik merekelerdiń birine oraı uıymdastyryldy. Ol – qazirgi el basshysy Kım Chen Ynnyń atasy.
«Phenıan marafony – erekshe tájirıbe, sebebi ol jergilikti turǵyndarmen aralasýǵa sırek múmkindik beredi. Soltústik Koreıa – kúrdeli ári qyzyqty el. Árıne, ol bárine jaramaıdy, biraq bul jabyq qoǵamǵa enip, óz kózińmen kórgisi keletinder úshin taptyrmas oryn», – dedi marafonǵa saıahat uıymdastyratyn pekındik Koryo Tours kompanııasynyń basshysy Saımon Kokerell.
Jarys Kım Ir Sen stadıonynda bastalyp, sol jerden qala kórnekilikterin aınalyp ótip, qaladan tys aımaqtarǵa deıin sozylǵan marshrýt boıynsha ótip, qaıta sol stadıonda aıaqtaldy. Jarysqa 50 myń kórermen jınaldy.
Phenıan marafony – World Athletics (Dúnıejúzilik jeńil atletıka qaýymdastyǵy) saıtynda kórsetilgen Soltústik Koreıadaǵy eń iri halyqaralyq sporttyq shara.
Mundaı is-sharalarǵa qaramastan, KHDR ıadrolyq baǵdarlamasy, zymyran synaqtaryna qatysty kelisimderdi jıi buzýy, hımııalyq qarý qory jáne Reseıdiń Ýkraınadaǵy soǵysyn qoldaýy sebepti halyqaralyq oqshaýlanýda qalyp otyr.
Totalıtarly ári jabyq memleketke kóptegen halyqaralyq sankııalar salynǵan. Amnesty International sekildi quqyq qorǵaý uıymdarynyń aıtýynsha, eldegi adam quqyqtarynyń jaǵdaıy álemdegi eń nashar deńgeıde.
