اقش-تىڭ پرەزيدەنتى دونالد ترامپ پەن ميللياردەر يلون ماسكقا قارسى ەل اۋماعىندا نارازىلىق شەرۋلەر وتۋدە، دەپ حابارلايدى "ادىرنا" ۇلتتىق پورتالى Deutsche Welle-گە سىلتەمە جاساپ.
باسىلىمنىڭ مالىمەتىنشە، سەنبى كۇنى ازاماتتىق قۇقىقتاردى قورعاۋ ۇيىمدارى، كاسىپوداقتار، ازشىلىقتاردى قورعاۋ قاۋىمداستىقتارى، ارداگەرلەر مەن سايلاۋ پروتسەسىنە قاتىسقان بەلسەندىلەر سياقتى 150-گە جۋىق ۇيىم 1200-دەن استام شەرۋ وتكىزۋدى جوسپارلاعان.
نارازىلىق شارالارى ۆاشينگتونداعى ۇلتتىق مولل، ءار شتاتتاعى كاپيتولي ماڭىنداعى اۋداندار مەن ەلدىڭ 50 شتاتىنىڭ باسقا دا ورىندارىندا وتكەن. ۇيىمداستىرۋشىلاردىڭ ايتۋىنشا، اقش استاناسىنداعى ۆاشينگتون مونۋمەنتى جانىندا 20 مىڭنان استام ادام جينالادى دەپ كۇتىلگەن.
اق ۇيدەن بىرنەشە كۆارتال جەردە «قولىڭدى تارت!» دەگەن جازۋى بار الىپ باننەر اشىق اسپان استىنا ىلىنگەن. نارازىلىققا شىققانداردىڭ كەيبىرى قولدارىنا «مەنىڭ پرەزيدەنتىم ەمەس!»، «فاشيزم كەلدى»، «زۇلىمدىقتى توقتاتىڭدار» دەگەن جازۋى بار پلاكاتتار ۇستاپ تۇرعان.
AP اگەنتتىگىنىڭ حابارلاۋىنشا، شەرۋگە شىققاندار ترامپ اكىمشىلىگىنىڭ مىڭداعان فەدەرالدى قىزمەتكەردى جۇمىستان شىعارۋ، تۇتاس اگەنتتىكتەردى ءىس جۇزىندە جابۋ، يمميگرانتتاردى ەلدەن شىعارۋ، ترانسگەندەرلەردى قورعاۋدى قىسقارتۋ جانە دەنساۋلىق ساقتاۋ باعدارلامالارىن قارجىلاندىرۋدى ازايتۋ سەكىلدى ارەكەتتەرىن قاتاڭ سىنعا العان.
5 ءساۋىر كۇنى بالتيمور ماڭىنداعى اقش-تىڭ الەۋمەتتىك قامسىزداندىرۋ قىزمەتىنىڭ شتاب-پاتەرى الدىنا بىرنەشە ءجۇز ادام جينالىپ، ەگدە جاستاعى ازاماتتار مەن مۇگەدەكتەرگە جاردەماقى تولەيتىن باسقارماداعى قىسقارتۋلارعا نارازىلىق ءبىلدىردى.
باق مالىمەتىنشە، نارازىلىق شارالارى پاريجدە، ريمدە جانە لوندوندا دا وتكەن. سونىمەن قاتار مەكسيكا مەن كانادادا دا وسىنداي شەرۋلەر وتكىزۋ جوسپارلانعان.
