مەملەكەت باسشىسى قاسىم-جومارت توقاەۆ «اقتاۋ – تۇركى الەمىنىڭ 2025 جىلعى مادەني استاناسى» گالا-كونتسەرتىنىڭ اشىلۋ سالتاناتىنا وراي ارنايى قۇتتىقتاۋ حاتىن جولدادى. پرەزيدەنتتىڭ اتىنان جولدانعان حاتتى مادەنيەت جانە اقپارات ءمينيسترى ايدا بالاەۆا وقىپ بەردى، دەپ حابارلايدى "ادىرنا" ۇلتتىق پورتالى.
«سىزدەردى اقتاۋ قالاسىنىڭ تۇركى الەمىنىڭ 2025 جىلى مادەني استاناسى اتانۋىمەن قۇتتىقتايمىن. بۇل – قازاقستان ءۇشىن عانا ەمەس، بارشا باۋىرلاس ەلدەر ءۇشىن ايتۋلى وقيعا»، – دەلىنگەن حاتتا.
پرەزيدەنت ءوز سوزىندە ماڭعىستاۋ مەن ءۇستىرت وڭىرلەرىنىڭ تۇركى وركەنيەتى ءۇشىن ماڭىزدىلىعىن اتاپ ءوتتى. بۇل قاسيەتتى ولكەدە ۇلتتىڭ جانە بۇكىل تۇركى دۇنيەسىنىڭ سان عاسىرلىق رۋحاني مۇراسى ساقتالعانىن ەسكە سالدى.
«تاريحى تامىرلاس، ءداستۇرى ساباقتاس حالىقتاردىڭ ىنتىماقتاستىعىن ودان ءارى نىعايتۋ – بارشامىزدىڭ ورتاق مىندەتىمىز. وسى اتاۋلى جىلدا باۋىرلاستىعىمىزدى بەكەمدەي تۇسەتىن باسقوسۋلار ۇيىمداستىرىلىپ، ماڭىزدى شەشىمدەر قابىلدانادى دەپ سەنەمىن»، – دەدى مەملەكەت باسشىسى.
سونداي-اق، ول تۇركى مەملەكەتتەرىنىڭ ءوزارا ىقپالداستىعىن نىعايتۋعا ۇلەس قوسىپ جۇرگەن تۇركسوي ۇيىمىنا جانە ءىس-شارانى ۇيىمداستىرۋعا اتسالىسقان بارلىق ازاماتتارعا ريزاشىلىعىن ءبىلدىردى.
«ءتۇبى ءبىر تۇركى جۇرتىنىڭ بىرلىگى نىعايا بەرسىن. بارشاڭىزعا باق-بەرەكە، تولايىم تابىس تىلەيمىن»، – دەپ قورىتىندىلادى توقاەۆ.
ايتا كەتەيىك، بۇعان دەيىن اقتاۋدا تۇركى الەمىنە ارنالعان اۋقىمدى گالا-كونتسەرتتىڭ باستالعانى حابارلانعان بولاتىن. كەش بارىسىندا كورەرمەندەر ديماش قۇدايبەرگەندى ەرەكشە ىقىلاسپەن قارسى الدى.
