Memleket basshysy Qasym-Jomart Toqaev «Aqtaý – túrki áleminiń 2025 jylǵy mádenı astanasy» gala-konertiniń ashylý saltanatyna oraı arnaıy quttyqtaý hatyn joldady. Prezıdenttiń atynan joldanǵan hatty Mádenıet jáne aqparat mınıstri Aıda Balaeva oqyp berdi, dep habarlaıdy "Adyrna" ulttyq portaly.
«Sizderdi Aqtaý qalasynyń túrki áleminiń 2025 jyly mádenı astanasy atanýymen quttyqtaımyn. Bul – Qazaqstan úshin ǵana emes, barsha baýyrlas elder úshin aıtýly oqıǵa», – delingen hatta.
Prezıdent óz sózinde Mańǵystaý men Ústirt óńirleriniń túrki órkenıeti úshin mańyzdylyǵyn atap ótti. Bul qasıetti ólkede ulttyń jáne búkil túrki dúnıesiniń san ǵasyrlyq rýhanı murasy saqtalǵanyn eske saldy.
«Tarıhy tamyrlas, dástúri sabaqtas halyqtardyń yntymaqtastyǵyn odan ári nyǵaıtý – barshamyzdyń ortaq mindetimiz. Osy ataýly jylda baýyrlastyǵymyzdy bekemdeı túsetin basqosýlar uıymdastyrylyp, mańyzdy sheshimder qabyldanady dep senemin», – dedi Memleket basshysy.
Sondaı-aq, ol túrki memleketteriniń ózara yqpaldastyǵyn nyǵaıtýǵa úles qosyp júrgen TÚRKSOI uıymyna jáne is-sharany uıymdastyrýǵa atsalysqan barlyq azamattarǵa rızashylyǵyn bildirdi.
«Túbi bir túrki jurtynyń birligi nyǵaıa bersin. Barshańyzǵa baq-bereke, tolaıym tabys tileımin», – dep qorytyndylady Toqaev.
Aıta keteıik, buǵan deıin Aqtaýda túrki álemine arnalǵan aýqymdy gala-konerttiń bastalǵany habarlanǵan bolatyn. Kesh barysynda kórermender Dımash Qudaıbergendi erekshe yqylaspen qarsy aldy.
