الماتى وبلىسى اكىمدىگى جولسىز جەرلەرمەن قاتىناۋ ءۇشىن TANK ماركالى ليۋكستىك جول تالعامايتىن كولىكتەردى مەملەكەتتىك ساتىپ الۋ ارقىلى يەلەنگەنىن مالىمدەدى، دەپ حابارلايدى “ادىرنا” ۇلتتىق پورتالى Kursiv-كە سىلتەپ.
بۇل كولىكتەر وبلىس اكىمى مارات سۇلتانعازيەۆتىڭ قىزمەتتىك ساپارلارىنا پايدالانىلماق.
جۋرناليست اسحات نيازوۆ الماتى وبلىسى اكىمدىگىنىڭ اشىق اۆتوتۇراعىنان بىرنەشە TANK كولىگىن، سونداي-اق جەكە ەسىك جانىنان Toyota Land Cruiser 300 كولىگىن بايقاعان. اكىمدىك اتالعان كولىكتەر وبلىس اكىمىنىڭ جۇمىس ساپارلارىنا ارنالعانىن راستادى. ولار قيىندىعى جوعارى جولسىز ايماقتارمەن جانە ۇزاق باعىتتارمەن جۇرۋگە ارنالعان. الايدا Toyota Land Cruiser 300 كولىگىنىڭ ناقتى كىمگە تيەسىلى ەكەنى جايلى اقپارات بەرىلمەدى.
“اۆتوكولىكتەر “مەملەكەتتىك ساتىپ الۋ تۋرالى” زاڭ اياسىندا اشىق كونكۋرس ارقىلى ساتىپ الىندى. بۇل – ساتىپ الۋ ءراسىمىنىڭ اشىقتىعىن جانە باسەكەلەستىگىن قامتاماسىز ەتتى”، – دەدى اكىم اپپاراتى باسشىسىنىڭ ورىنباسارى ەرنات بايعالىق.
مەملەكەتتىك ساتىپ الۋ پورتالىنداعى مالىمەتكە سايكەس، اكىمدىك 2023 جىلى ەڭ ءىرى اۆتوديلەر سانالاتىن Allur كومپانياسىنان جالپى سوماسى 562 ميلليون تەڭگەگە اۆتوكولىكتەر ساتىپ العان. سونىمەن قاتار، وبلىس اكىمىنىڭ نەگىزگى قىزمەتتىك كولىگى – Kia K900 ەكەنى ناقتىلاندى.
ايتا كەتەيىك، اكىمدىك عيماراتىنىڭ كۇزەتشىسى جۋرناليستكە Toyota Land Cruiser 300 كولىگىمەن اكىمنىڭ ءوزى كەلگەنىن ايتقان. الايدا بۇل قىمبات كولىكتىڭ كىمگە تيەسىلى ەكەنى ازىرگە بەلگىسىز. رەسمي ديلەرلەردىڭ مالىمەتىنشە، اتالعان كولىكتىڭ قۇنى 47 690 000 تەڭگەدەن باستالىپ، 69 490 000 تەڭگەگە دەيىن جەتەدى.
بۇعان دەيىن دە بىرنەشە ءوڭىر اكىمى قىمبات كولىك ساتىپ الۋى ارقىلى قوعامنىڭ سىنىنا ۇشىراعان بولاتىن.
