ەل وڭىرلەرىندە وتاندىق كينونى ىلگەرى لەتۋ جۇمىستارى جالعاسۋدا. بۇل – ماڭىزدى مىندەت، ونىڭ ورىندالۋى قازاقستاندىق كينەماتوگرافيانى جاڭا دەڭگەيگە كوتەرۋگە مۇمكىندىك بەرەدى، ءارى ءاربىر فيلمگە ءوز كورەرمەنىن تابۋعا سەپتەسەدى.
مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءتورتىنشى وتىرىسىندا كينو يندۋستريانىڭ دامۋىن ەرەكشە اتاپ وتكەن بولاتىن.
4 ساۋىردە سولتۇستىك قازاقستان وبلىسىندا قازاق كينوسىنىڭ كۇندەرى باستالدى. باستى ماقسات – كوپشىلىكتى دارىندى جەرلەس رەجيسسەرلەرمەن جانە ولاردىڭ كارتينالارىمەن تانىستىرۋ. ءدال وسى فيلمدەر ەل مادەنيەتىن اشىپ كورسەتەدى. كوپتەگەن كارتينالار مەملەكەت تاريحىنداعى نەگىزگى كەزەڭدەردى بايانداپ، كورنەكتى قوعام قايراتكەرلەرىنىڭ ءومىرى مەن قىزمەتىن تانىستىرادى.
«قازىرگى ۋاقىتتا مادەنيەت جانە اقپارات ءمينيسترى ايدا عالىمقىزى بالاەۆا وتاندىق كينونى دامىتۋعا ەرەكشە كوڭىل بولۋدە. ءبىز ورتالىقتىڭ قولداۋىمەن تۇسىرىلگەن بارلىق جوبانىڭ كورەرمەنگە جەتۋىن قالايمىز. وبلىس ورتالىعىندا عانا ەمەس، اۋدانداردا، اۋىلداردا دا بۇل باعىتتاعى جۇمىستى تۇراقتى نەگىزدە جۇرگىزەتىن بولامىز»، – دەدى ۇلتتىق كينونى قولداۋ مەملەكەتتىك ورتالىعى كەاق باسقارما توراعاسى قۇرمانبەك جۇماعالي.
سونىمەن قاتار ۇلتتىق كينونى قولداۋ ورتالىعى رەسپۋبليكالىق قانا ەمەس، وڭىرلىك تەلەارنالارمەن دە بەلسەندى ارىپتەستىك ورناتقان. سولتۇستىك قازاقستان تەلەارنالارىندا وتاندىق فيلمدەر ۇزبەي كورسەتىلىپ ءجۇر. قازاق كينوسىنىڭ ون كۇندىگى اياسىندا «Qyzyljar Creative Center» ورتالىعىندا «پەرۆىي سەۆەرنىي» تەلەارناسىمەن ىنتىماقتاستىق مەموراندۋمىنا دا قول قويىلدى.
وتاندىق كينو ون كۇندىگىنىڭ ءبىرىنشى كۇنى كورەرمەندەرگە رەجيسسەر سەرىكبول وتەپبەرگەنوۆتىڭ «پاتريوتتار ۋاقىتى» ءفيلمى كورسەتىلدى. بۇل – تەرروريزمگە قارسى كۇرەس پەن وتباسىلىق قۇندىلىقتار تۋرالى ەكشن-فيلم. كينوكارتينانىڭ سيۋجەتى ەكى اعايىندى اراسىندا ءوربيدى. ۇلكەنى بارلاۋ قىزمەتىندە، ال كىشىسى جويعىش ۇشقىش بولىپ قىزمەت ەتەدى. ولاردىڭ اكەسى شايقاستا قازا تاپقان. ونى ەسكە الۋ جانە اسكەردەگى قىزمەت – اعايىندىلاردى بىرىكتىرەتىن جالعىز دۇنيە.
«مۇنداعى مورال – ءبىز ۇلتقا، دىنگە بولىنبەستەن جۇدىرىقتاي جۇمىلۋىمىز كەرەك. بۇل ءفيلمدى ءتۇسىرۋ ءۇشىن بىزگە ءبىر جىل قاجەت بولدى. كومپيۋتەرلىك گرافيكا كوپ ۋاقىت تالاپ ەتتى. بۇل – ۇزاق پروتسەسس، بىراق سونىڭ ارقاسىندا فيلم اناعۇرلىم اسەرلى بولدى»، – دەدى رەجيسسەر سەرىكبول وتەپبەرگەنوۆ.
ون كۇندىكتىڭ اشىلۋ سالتاناتىنا سقو اكىمى اپپاراتىنىڭ باسشىسى رۋسلان الىشەۆ قاتىستى. ول ءوڭىر اكىمىنىڭ اتىنان قاتىسۋشىلاردى قۇتتىقتاپ، وتاندىق كينەماتوگرافيانى ناسيحاتتاۋ جونىندەگى جۇمىستىڭ ماڭىزىن اتاپ ءوتتى.
«بۇل وسكەلەڭ ۇرپاقتى تاربيەلەۋ، قوعامدىق سانانى قالىپتاستىرۋ ءۇشىن زور ماڭىزعا يە. وڭىرلەردە مەملەكەت ەسەبىنەن تۇسىرىلگەن فيلمدەردى كورسەتۋ يدەياسىن وڭ باعالايمىز. ءبىزدىڭ كينوكومپانيالار ساپالى كارتينالار شىعارا وتىرىپ، الەمدىك كينو پروكاتتا دا ءوز ورنىن قالىپتاستىرۋدا.
قازاقستاندا قازىر كينو يندۋستريانى دامىتۋ ءۇشىن بارلىق جاعداي جاسالعان، ءبىزدىڭ جاڭا شىعارماشىلىق ورتالىعىمىز دا وسى ماقساتتارعا جاۋاپ بەرەدى. بىزدە ۇلكەن جوسپارلار، تاماشا يدەيالار مەن كاسىبي اكتەرلەر بار»، – دەدى ول.
كينو كۇندەرى اياسىندا ءارتۇرلى جانرداعى فيلمدەر ۇسىنىلماق. جەكەلەي جىكتەسەك، «جامبىل. جاڭا ءداۋىر»، «دوس-مۇقاسان» ارقىلى تۇلعالارىمىزدىڭ ءجۇرىپ وتكەن جولىنا قانىعۋعا بولادى. ال «باۋىرىنا سالۋ» دەپ اتالاتىن كينودا ءداستۇرىمىز دارىپتەلىپ، ۇلتقا دەگەن سۇيىسپەنشىلىك سەزىمى ەسەلەنبەك. كىشكەنتاي كورەرمەندەرگە «تايقازان» دەپ اتالاتىن انيماتسيالىق تۋىندى كورسەتىلەدى.
ايتا كەتەيىك، بۇعان دەيىن كينو ورتالىعىنىڭ قولداۋىمەن 117 كارتينانىڭ ءوندىرىسى اياقتالدى. ونىڭ 72-ءسى – كوركەم، 37-ءسى – دەرەكتى، 8-ءى – انيماتسيالىق فيلمدەر.
