ۋكراينا جەرىندەگى اسكەري قاقتىعىستار كەزىندە رەسەي اسكەرىنىڭ قۇرامىندا بولعان تاعى ءبىر قازاق جىگىتى كوز جۇمدى. بۇل تۋرالى سامات نۇرتازا ءوزىنىڭ Facebook پاراقشاسىندا جازدى، دەپ حابارلايدى "ادىرنا" سايتى.
"ۋكراينا ەلىندە ساراتوۆ وبلىسىنىڭ تۋماسى تاعى ءبىر ەتنيكالىق قازاق قايتىس بولدى. بۇل گۆارديا سەرجانتى نۇرىلبەك بوگەتاەۆ. ول ءپاراشيۋتتى-دەسانتتار روتاسىنىڭ جاۋىنگەرلىك ماشيناسىنىڭ كومانديرى بولدى", دەپ جازدى.
سونداي-اق جەلىدە قازاققا ۇقساس تاعى ءبىر ادامنىڭ كوز جۇمعانى جايىندا ماقالا پايدا بولدى.
"ۋكراينادا رەسەي وكۋپانتتارىنىڭ ارنايى ءبولىم كومانديرى ازامات الينوۆتىڭ كوزى جويىلدى. ول ومبىدان بولاتىن" دەگەن تاقىرىپپەن ماقالا جاريالادى. ونى دا كوپشىلىك قازاق دەپ توپشىلادى.
"ىلعي كومانديرلەر ەكەن، اتتەڭ وسىلار ءوز اسكەرىمىزدە قىزمەت ەتكەندە عوي", "مەنىڭشە ورىستار العى شەپكە رەسەيدەگى سانى از ۇلتتاردى قاساقانا جىبەرىپ جاتقان سياقتى" ، "ەگەر ۋكرايناعا قارۋمەن بارعان بولسا وندا قازاق ەمەس", "ونىڭ باسقا امالى بولمادى، سەبەبى ول رەسەيدە تۇرادى، ءبىر سوزبەن ايتقاندا تاۋەلدى", "ايانىشتى، وزگە جەردە ءجۇرىپ، وزگەلەر ءۇشىن جان تاپسىرۋ قانداي قيىن", دەگەن ماعىناداعى پىكىرلەر جازدى.
ەسكە سالساق، رەسەي ۋكراينا جەرىندەگى ارەكەتتەرىن بايلانىستى "ارنايى اسكەري شارا" وتكىزىپ جاتىرمىز دەپ مالىمدەدى. بۇگىن ونىڭ باستالعانىنا تۋرا 29 كۇن بولدى.
